Qazaqstan Respýblıkasynyń Din isteri jáne azamattyq qoǵam mınıstri Nurlan Ermekbaev Astana qalasyndaǵy «Qudaı Ananyń qaltqysyz kómegi» Katolık kafedraldy soborynda bolyp, Rım-Katolıktik Arhıeparhıasynyń Arhıepıskopy Tomash Petamen kezdesti, dep jazady Qamshy.kz aqparat agenttigi.

Kezdesý barysynda memleket pen dinı birlestikter arasyndaǵy ózara is-qımyldyń ózekti máseleleri, eldegi konfesıaaralyq kelisimdi nyǵaıtý jaıy talqylandy.

Nurlan Ermekbaev beıbitshilik pen tynyshtyqty nyǵaıtý jolynda el azamattarynyń rýhanı ómirine jáne qazaqstandyq qoǵamnyń damýyna úles qosyp kele jatqan rım-katolıktik shirkeýiniń mańyzdy rólge ıe ekenin atap ótti.

Arhıepıskop QR Úkimetine jáne Soltústik Qazaqstan oblysynyń ákimdigine Qudaı Ana – beıbitshilik patshaıymy katolıktik hramy ornalasqan shirkeýge qatynaıtyn Kellerovka eldi-mekeninen Ozernoe aýylyna deıingi (Soltústik Qazaqstan oblysy) avtojoldarǵa jóndeý jumystaryn júrgizý máselesin oń qarastyrǵanyna alǵysyn bildirdi. Bul jerde mańyzy jaǵynan Ierýsalımnen keıin ekinshi sanalatyn «Qazaqstan juldyzy» katolıktik taǵzym etý altary ornalasqan. Onda álemniń barlyq elinen kelgen katolıkter taǵzym etedi.

Óz kezeginde, Arhıepıskop Tomash Pet sobordyń qurylý tarıhyn áńgimeledi, sondaı-aq rýhanı qundylyqtardy qalyptastyrý, beıbitshilik pen tózimdilik, birlikti jáne Qazaqstan halqynyń birligin saqtaý jolyndaǵy dindarlardyń mádenı-aǵartýshylyq jumystary jaıynda habardar etti.

Astana qalasynda «Qudaı Ananyń qaltqysyz kómegi» shirkeýi 1999 jyly ashylǵan. Qazaqstanda Rım-Katolıktik shirkeýiniń 80 dinı birlestigi óz jumysyn júzege asyrýda.  Sondaı-aq olar resmı túrde tirkelgen konfesıalardyń quramyna kiredi.

Kezdesý sońynda mınıstr N. Ermekbaev Arhıepıskopty jáne Rım-Katolıktik shirkeýiniń qyzmetkerlerin aldaǵy kele jatqan Alǵys aıtý kúnimen quttyqtady.