«Eýrazıa» birinshi telearnasy bas dırektorynyń orynbasary, eks-senator Svetlana Jalmaǵambetova «Qalaýlym» baǵdarlamasyna qatysty aıtylǵan synǵa jaýap berdi, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge ala otyryp.

«Eýrazıa» birinshi arnasynda kórsetiletin «Qalaýlym» baǵdarlamasy týraly jurt birazdan beri shýlap júr. Halyqtyń narazylyǵynan keıin aqparat jáne komýnıkasıalar mınıstrligi baǵdarlamany tekserýge ýáde bergen edi. Alaıda kópshiliktiń synyna ushyraǵan «Qalaýlym» áli efırden kórsetilip keledi.

Búgin «Nur Otan» partıasy janyndaǵy «Mıras» respýblıkalyq keńesiniń otyrysynda da bul másele nazardan tys qalmady. Májilis depýtaty Baqytgúl Hamenova elimizde túkke turǵysyz jeńil dúnıeler túsirý sánge aınalyp bara jatqanyn aıtyp kúıindi. 

Osydan keıin eks-senator,  telearna bas dırektorynyń orynbasary Svetlana Jalmaǵambetova jıynda aıtylǵan biraz synǵa jaýap berdi.

««Qalaýlym» baǵdarlamasyna toqtalaıyn. Baqytgúl, (májilis depýtaty Hamenova – red.eskert.) sizge baǵdarlama unamaıdy. Siz kórmeseńiz, kórmeı-aq qoıyńyz. Bul basqa tok-shoýlarmen salystyrǵanda reıtıńisi eń joǵary baǵdarlama. Birde-bir telearnada 3 saǵat boıy kórermenniń nazaryn ustap otyratyn baǵdarlama joq», — dedi  ol.

Jalmaǵambetova reıtıńisi joǵary «Qalaýlym» baǵdarlamasynda óte ózekti máseleler qozǵalatynyn atap ótti.

«Bul baǵdarlama óte mańyzdy máselelerdi kóteredi. Búgingi tańda, ókinishke qaraı, elimizde turmys qurmaı, jalǵyz qalǵan qyzdar kóp. Olar anda-mynda barýǵa uıalady. Al bul máseleni biz tek toqal alyp qana sheshý kerekpiz be? 21 ǵasyrda ómir súre otyra, nege orta ǵasyrǵa sheginýimiz kerek? Buǵan qosa qurylysta, taǵy basqa jerlerde jumys izdep júrgen azamattar kóp, olar úılenýge ýaqyt taba almaı júr. Sondyqtan osondaı azamattar baǵdarlamaǵa keledi. Áleýmettik jelide jaman pikirler aıtylyp jatyr deısizder. Biraq jaqsy pikirler de bar. Bizge kóp hat túsedi. Kórermender habarlasyp, "baǵdarlamany nege Astanada túsirmeısińder? Biz de qatysaıyq" deıdi. Al endi biri alǵysyn bildirip jatady», — dedi eks-senator.

Jalmaǵambetova reıtıń úshin bastapqy kezde efırden yńǵaısyz jaǵdaılar kórsetilgenin moıyndady.

«Alǵashynda reıtıńti kóterý úshin biz tikeleı efırde qolaısyz jaǵdaılardy kórsettik. Biraq baǵdarlamanyń reıtıńisi kóterile bastaǵan soń, bul máseleni basqasha sheshe bastadyq.  Qazirgi tańda bizde tehnıkalyq múmkindikter jeterlik. Eger efırde urys-keris shyqsa, barlyǵyn kesip tastaımyz. Osylaısha baǵdarlamany retke keltirip jatyrmyz», — dedi sóz sońynda ol.