Búgin Parlament palatalarynyń birlesken otyrysynda sóz sóılegen Nursultan Nazarbaev: «2019 jyldan bastap jalaqysy 25 AEK-ten tómen jumysshylarǵa salyqty on ese az tóletýdi usynamyn», – dedi. Al eńbek jáne áleýmettik qorǵaý mınıstri Mádına Ábilqasymova: «Jumyssyz azamattardan salyq jınaımyz», – dep jaqynda ǵana aıdy aspanǵa shyǵarǵan edi. Sonda bul qalaı bolǵany?

Nursultan Nazarbaevtyń sózinen uqqanymyz, jalaqysy tómen qazaqstandyqtardyń salyǵyn azaıtý arqyly olardyń turmysyn túzeýge bolady eken. Májilis depýtaty Azat Perýashev Elbasynyń bul bastamasyn qoldap otyr.

– Elbasynyń jalaqysy 25 AEK-ten tómen jumyskerlerdiń salyqty az tóleýi jaıly bastamasy úlken jeńildik bolmaq. Ol bıznes úshin de óte paıdaly. Mysaly, qurylys materıaldaryn shyǵaratyn kompanıalarda isteıtin qanshama adamnyń, shyny kerek, jalaqysy onsha jaqsy emes. Eger biz osy reformaǵa kóshsek, olardan alynatyn salyqtyń mólsheri onnan bir paıyzǵa tússe, ol aqsha kásipkerlerdiń ózine emes, jumyskerlerdiń jalaqysyna qosylýy kerek. Iaǵnı olardyń jalaqysy toǵyz paıyzǵa ósip ketýi múmkin, – deıdi Perýashev.

Endi Mádına hanymnyń málimdemesin oı eleginen ótkizip kóreıik. Osydan bir aı buryn eńbek jáne áleýmettik qorǵaý mınıstri bolyp taǵaıyndalǵan Mádına Ábilqasymova jańa qyzmetine kirise salysymen: «Jumyssyz azamattarǵa salyq salýymyz kerek, – dep eldi dúrliktirdi.

– Bizde ózin ózi jumyspen qamtamasyz etip júrgen shamamen 2-3 mıllıon adam bar. Olar eshqandaı salyq tólemeıdi, zeınetaqy qoryna qarjy aýdarylmaıdy. Mindetti saqtandyrý qoryna da qatysa almaıdy. Biz osyny retteý úshin jańa zań ázirlep jatyrmyz. Ózin ózi belgisiz jumyspen qamtyp júrgen 3 mıllıon azamatty resmı tirkep, olarǵa memleketke salyq tóletemiz, – dep kárine mingen bolatyn jańa mınıstr.

Al búgingi jıynda Elbasymyz, kerisinshe, jumyssyz júrgen nemese aılyǵy tómen qazaqstandyqtarǵa qoldaý kórsetý maqsatynda jańa bastama kóterdi. Muny mınıstrdiń prezıdentke qarsylyǵy dep túsinemiz be? Álde Ábilqasymova raıynan qaıtyp, aıtqan sózinen resmı túrde bas tarta ma?

– Men bul oımen kelise almaımyn. Sebebi ózderin jumyspen qamtyp júrgen azamattarǵa, birinshi kezekte, memleketten aqsha suramaı, ózderi eńbek etip júrgenderine rıza bolýymyz kerek. Mysaly, búginde bazarlarǵa baryp arba ıterip nemese basqa da qarapaıym jumystardy atqaryp júrgen azamattar kóp. Biz olarǵa, kerisinshe, kómek kórsetýimiz kerek. Ondaı adamdardan qalaı salyq jınaıyn dep otyr, bilmedim. Bul – úlken másele, – deıdi Azat Perýashev.

Ras-aý. Jalyqysy az adamdar jeńildikpen bir paıyz kóleminde salyq tóleıtin bolsa, jumyssyz júrgender salyqty qalaı jáne qandaı paıyzben tóleıdi?