Búgin Qazaq televızıasyna 60 jyl tolyp otyr. Bul týraly «Qazaqstan» RTRK» AQ-nyń Basqarma tóraǵasy Erlan Qarın Feısbýktegi paraqshasynda jazdy, dep habarlaıdy Qamshy.kz aqparat agenttigi.

"Qurmetti dostar! Búgin Qazaq televızıasy úshin aıtýly kún! Osydan 60 jyl buryn qazaq teledıdarynyń negizi qalanyp, alǵashqy otandyq habarlar efırge shyǵa bastady. 1958 jyly 8 naýryzda alǵashqy ret efır testili túrde taratyldy, al 16 naýryzda efır turaqty túrde taratyla bastady. Qazaq televızıasy 60 jyldyq damý tarıxynda halqymyzdyń rýhanı, mádenı, qoǵamdyq qundylyqtarynyń damýyna, ulttyq sana sezimniń qalyptasýyna qosqan úlesi ólsheýsiz, mańyzy erekshe. Ár qazaqtyń tórinen oryn alǵan kógildir ekrannan san túrli qundy dúnıeler jaryq kórip, qalyń kórermenge jol tartty. 

Qazaq televızıasy – qazaq zıaly qaýymynyń rýhanı, mádenı oshaǵy boldy. Osy qara shańyraqta ár jyldary eńbek etken zıaly qaýym kóptegen jas mamandardy tárbıelep, bolashaqqa baǵyt berdi, jol siltedi, otandyq televızıa mektebiniń qalyptasýyna atsalysty. Ulttyq arna ár kezeńde zaman aǵymyna saı ózgerip, bolashaqqa qanat qaǵyp keledi. 

Biz ádettegideı, «Altyn qorda» saqtalǵan telebaǵdarlamalar men televızıa ardagerleri jaıly baǵdarlamalardy kórsetýdi jalǵastyramyz.

Atap aıtsaq: 7 naýryzda, 17:35-te Belgili kúıshi jáne termeshi, qazaq teledıdarynyń rejıseri Murat Kárımýllın jaıly «Jarqyn beıne», 8 naýryzda, 17:05-te qazaqtyń alǵashqy dıktory Zulqıa Jumatova jaıly «Kelbet», 10 naýryzda, 08:20-da jáne 11 naýryz, 11:25-te qazaq televızıasynyń ardagerleri qatysqan «Dara jol», 10 naýryz, 16:35-te qazaq televızıasynyń 60 jyldyǵyna arnalǵan arnaıy habar, al 11 naýryzda, 17:25-te belgili jýrnalıs Beıbit Qusanbektiń «Ómir-ózen» baǵdarlamalaryn tamashalaı alasyzdar! 

Keshegi kún - búgingi tarıh demekshi, kezinde el múddesi úshin atsalysqan ardagerlerimizdi umytpaý – bizdiń paryzymyz!

Al, 16 naýryzda «Qazaqstan» Ulttyq arnasy qazaq televızıasynyń 60 jyldyǵyna oraı, televızıa ardagerlerine arnap saltanatty jıyn ótkizedi. 

Aldaǵy ýaqytta Ulttyq arnany budan da bıik asýlar kútip tur. «Qazaqstan» ujymy talaı belesterdi baǵyndyryp, úlken jetistikterge jetetinine senimdimiz! Barshańyzdy Qazaq televızıasynyń 60 jyldyq mereıtoımen quttyqtaımyz!" - dep jazady Erlan Qarın.