Almatylyq bloger Ádilet Rahmetolla jumysy elene bermeıtin áıelderdi erekshe tásilmen quttyqtap, Instagram jelisindegi paraqshasynda jarıalady. Bul týraly Qamshy.kz aqparat agenttigi Tengrinews.kz saıtyna silteme jasap habarlaıdy.

«Beıtanys jan sizge óte sulý ekenińizdi aıtyp, gúl syılasa, qandaı sezimde bolar edińiz?! Mundaı tosyn áreket jumys basyndaǵy adamǵa qalaı áser etpek? Halyqaralyq áıelder kúni qarsańynda bul suraqtyń jaýabyn anyqtap kórýge tyrystym. Shara barysynda men ártúrli qyzmettegi áıelderdi sýretke túsirip: «Siz sondaı ádemisiz. Myna gúl sizge», - dep iltıpatymdy bildirdim jáne ol kisilerdiń júzindegi baqyt pen tańdanysty kamera obektıvine túsirip úlgerdim», - deıdi Ádilet Rahmetolla.

«Árıne, fotoaparatty kórgen kezde qashqaqtap, bas tartqandar az bolmady. Alaıda men ózimniń kásibıligimdi iske qosyp, qajetti kadrlardy tabýǵa tyrystym. Kim de bolsa kóshe sypyrýǵa qýanyp shyqpaıtyny anyq qoı. Mysaly, kóshe sypyryp júrgen tátemiz áýeli qarsy boldy. «Biz túsirýge tıispiz. Bizge sondaı tapsyrma tústi», - dep jáı ǵana túsirip aldym! Sodan keıin: «Siz sondaı sulýsyz. Baqytty bolyńyz», - dep gúl usynǵan kezde qýanyshtan júzi bal-bul jaınap ketti", - dep baıandaıdy bloger.

«Samsa satatyn arýǵa: «Siz sulýsyz. Myna gúl sizge», - dep usynǵan kezde múldem senbedi. «Qazir túsirilimnen keıin alyp ketesizder me? Shynymen de maǵan ba?», - dep tańǵalyp, biraz túsinbeı turdy. Fotomodelderimniń arasynda «gúl almaǵaly 5-6 jyl bolyp edi, mynaý bir baqyt boldy ǵoı» dep qýanǵandar da, «tońyp júrgende janyma jylý syıladyńyzdar» degen ápkelerimiz de, «ózińniń aqshańa satyp aldyń ba? Qap, beker shyǵyndandyń ǵoı" dep qaltamyzdy aıaǵan jandar da boldy», - dep qyzyqtarymen bólisti Ádilet óz paraqshasynda.

«Eń bastysy, syılyqtyń baǵasy emes, meıirimdilik mańyzdy ekenin sezindik. Ózderińiz fotosýretterge muqıat qarasańyzdar, jyly sóz áıelderdi erekshe árleıtinin sózsiz túsinesizder. Sondyqtan aınalańyzdaǵy názik jandylarǵa jıi iltıpat kórsetip, mahabbatqa toly jyly sózderińizdi aıtýdan sharshamańyzdar. Alla razy bolsyn!», - dep aıaqtady ol.