Almatylyq Iýlıa Sheglova áleýmettik jeli arqyly habarlama taratyp, balasyn 20 myń AQSH dollaryna satpaq bolady. 5 sáýirde Máskeýge kelip, kelisim boıynsha balany ózgeniń qolyna berýge bel baılapty. Al Iýlıanyń anasy barlyq jaǵdaıdy bolar is bolǵannan soń estigenin aıtady, dep habarlaıdy KTK-ǵa silteme berip Qamshy.kz aqparat agenttigi.

"Ekinshi sáýirde úıde bolǵan. Biraq, úıge kelsek áldenege asyqqany baıqalady. Teledıdar qosýly qalǵan. Tamaǵy ishilmegen. Onyń qashan Reseıge ketkenin, ne úshin mundaı qadamǵa barǵanyn bilmeımin. O jaqtan habar jetkende, talyp qala jazdadym", — deıdi Iýlıa Sheglovanyń anasy Lúbov Zaıseva.  

Iýlıa Sheglova júktiliktiń 3 aılyq kezeńinde kúıeýimen ajyrasqan eken. Oǵan qoldaý bildirip, járdemdesken jandar Iýlıa bosanǵan soń qatty kúızeliske ushyraǵanyn aıtady. 

"Estigende eseńgirep, túnimen uıyqtamaı shyqtym. Bárimiz bir-birimizge habarlasyp, bolǵan jaıttyń aqıqattyǵyna kóz jetkizdik. Biz oǵan senip, úmit artqan edik. Ulyna qajetti dári-dármek, kıim-keshek bolsyn, barlyǵyn oǵan tapsyrǵanbyz. Shyndyǵynda eshteńege muqtaj emes bolatyn", — deıdi Almaty qalasynyń turǵyny Anıta Gýrman.

Al, balasyn saýdalaǵan bezbúırek kelinshektiń burynǵy kúıeýi qazir Máskeýge attanypty. Odan jaýap alynyp, jábirlenýshi retinde tanylǵan. Al tergeý ókilderi barlyq qujattarmen tanysqan soń, balany ákesiniń qolyna bergen.

33 jastaǵy Iýlıa Sheglovanyń áreketin qarjylyq qıynshylyqtan dep boljaǵandar da bar. Biraq Almatyda turatyn anasy "bizge basyndaǵy ahýaldy aıtqanda qyzymyzdy kez kelgen qıyndyqtan qutqaratyn edik" deıdi. Qazir qazaqstandyq azamatshaǵa adam saýdalaý baby boıynsha qylmystyq is qozǵalyp, qolyna kisen salynǵan.