QR İshki ister mınıstrliginde ishki ister organdarynyń bıylǵy jyldyń birinshi toqsanyndaǵy jumys qorytyndysy boıynsha alqa otyrysy ótti, dep habarlaıdy Qamshy.kz aqparat agenttigi mınıstrliktiń baspasóz qyzmetine silteme jasap. 

Mınıstr Qalmuhanbet Qasymovtyń tóraǵalyǵymen ótken alqa otyrysyna İİM ortalyq apparaty, Ulttyq ulannyń basshylyq quramy, óńirlik ishki ister departamentteri, qylmystyq atqarý júıesi jáne jergilikti polısıa qyzmeti bólinisteriniń basshylary qatysty. Jıynda mınıstr birinshi toqsanda 65,7 myń qylmys jáne 7,8 myń qylmystyq áreket tirkelgenin atap ótti. Bul kórsetkish ótken jyldyń osy kezeńimen salystyrǵanda 12% jáne 23% tómen. Osynyń ishinde aýyr qylmys (-6%), tonaý (-15%), urlyq (-13%), zorlyq kórsetý (-16%), buzaqylyq (-19%) sıaqty qylmys túrleri aıtarlyqtaı azaıǵan.

Jıynda Q. Qasymov Urlyqqa qarsy kúrestiń 2018-2020 jyldarǵa arnalǵan baǵdarlamasyn iske asyrý boıynsha belsendilikti arttyrý qajettigin basa aıtty. Jyl basynan beri osy baǵdarlama aıasynda óńirlerdegi jedel jaǵdaıdy saýyqtyrý jáne qylmystyń aldyn alý boıynsha 42 800 naqty is-shara qabyldanǵan.

Alqa otyrysy barysynda qylmystyq sot óndirisin jańǵyrtýǵa baǵyttalǵan qylmystyq-prosessýaldyq zańnamanyń jańa talaptaryn qoldaný problemalary men is-tájirıbeleri, esirtki qylmysyna qarsy kúres sharalary, qylmystyq atqarý júıesiniń probasıa qyzmetin jetildirý máseleleri jan-jaqty talqylandy.

Jıyndy qorytyndylaǵan İshki ister mınıstri Q. Qasymov Memleket basshysynyń qazirgi ýaqyttaǵy tapsyrmalaryn iske asyrýǵa baǵyttalǵan birqatar mańyzdy máselelerdi atap kórsetti. Sondaı-aq, ishki ister organdary qyzmetiniń barlyq salasynda tártip pen zańdylyqty saqtaý, áskerı jáne qyzmettik daıyndyqty nyǵaıtýǵa qatysty tapsyrma berdi.