Búgin Shymkent qalasynda QR Din isteri jáne azamattyq qoǵam mınıstri Darhan Káletaev stýdentter jáne jastar belsendilermen kezdesý ótkizdi.

Mınıstr D.Káletaev óz sózinde adamnyń negizgi ómirlik qajettiligine aınalatyn joǵary bilim alýdyń mańyzdylyǵyn atap ótti.

Onyń pikirinshe, talapkerler oqý ornyn jáne mamandyǵyn tańdaý kezinde joǵary bilim ordasynyń mártebesine jáne tegin bilim alý múmkindigi sıaqty mańyzdy ólshemderge kóp nazar aýdara bermeıdi.  

Mınıstr buǵan dálel retinde jastardyń qalaıtyn mamandyqtaryna júrgizilgen áleýmettik zertteýlerdiń derekterin keltirdi. Tańdaýly mamandyqtar arasynda zańger (13%), medısına (10,5%), ekonomıka (7,7%), dızaın (6,5%), qarjy (5,9%), kólik (5,3%) sekildi mamandyqtar atap ótiledi. «Bolashaqtyń mamandyqtary», onyń ishinde aqparattyq tehnologıalar (4,4%) basymdyqqa ıe mamandyq qataryna enbeıdi.

«Bul pragmatızmniń joqtyǵyn bildiredi. Bilimdi tegin alýǵa múmkindik bola tura, sizderge quny qymbat jáne eńbek naryǵynda talap etilmeıtin bilim úshin tólemaqy jasatyp, óz ata-analaryńyzdy qaryzǵa batyrýdyń qajeti nede?»-dep kezdesýge jınalǵan jastarǵa saýalyn joldady mınıstr Darhan Káletaev. 

Mınıstr ótken oqý jylynan bastap Memleket basshysynyń bastamasy boıynsha «Barshaǵa ortaq tegin tehnıkalyq jáne kásiptik bilim» baǵdarlamasy bastalǵanyn eske salyp ótti. Sondaı-aq, 2017-2021 jyldarǵa arnalǵan Nátıjeli jumyspen qamtýdy jáne jappaı kásipkerlikti damytý baǵdarlamasynyń sheńberinde jumyssyzdardy qaıta daıarlaý úshin jaqsy jaǵdaılar jasalǵan. Budan bólek,  aǵymdaǵy jyldyń naýryz aıynda Memleket basshysy óziniń «Bes áleýmettik bastama» úndeýinde memlekettik qoldaý sharalaryn jarıalaǵany belgili.

«Jastar saıasaty salasynda qatysy bar jastardyń eshqaısysy nazardan tys qalmaıdy. Qarapaıym otbasylardan shyqqan Qazaqstanda tabysqa jetken  birneshe jastardy  mysal retinde aıta alamyn», - dedi Darhan Káletaev.

Esterińizge sala keteıik, búgin Shymkent qalasynda Qazaqstan Respýblıkasynyń Prezıdenti janyndaǵy Jastar saıasaty jónindegi keńesiniń HHİ otyrysy ótti. Sharada «Rýhanı jańǵyrý» baǵdarlamasy aıasynda qazirgi qazaqstandyq jastardyń qundylyq maqsattary men jastar arasyndaǵy mádenı-bos ýaqyt qyzmetterin tımidi uıymdastyrý máseleleri talqylandy.