Qoǵamdyq baqylaý komısıasynyń (QBK) Pavlodar oblysyndaǵy tóraǵasy Natalá Kovlágına 13 sáýirde ol komısıanyń 12 múshesimen birge Pavlodardaǵy Respýblıkalyq ortalyq somatıkalyq aýrýhanada (Pavlodardaǵy AP-162/2 mekemesi, túrme sanıtarlyq qalashyǵy) jatqan belsendi Maks Boqaevqa barǵan dep jazady Qamshy.kz aqparat agenttigi Azattyqqa silteme jasap. Boqaev bul jerge bir kún buryn Petropavldan boljam boıynsha qoıylǵan «omyrtqa jaryǵy» dıagnozynan emdelýge etappen jetkizilgen.
Qazir Maks Boqaev óziniń densaýlyq jaǵdaıyn qalypty dep baǵalaıdy. Quqyq qorǵaýshy Kovlágınniń aıtýynsha, aıaǵy áli uııtyn, biraq burynǵydaı qatty aýyrmaıtyndyqtan ózdiginen júre alady. Keshe Boqaevty hırýrg qarap, operasıa jasaıtyndaı sebep tappaǵan. Hırýrg Boqaevqa túrli dıagnostıkadan ótýdi tapsyrǵan, túpkilikti qorytyndy keıinirek shyqpaq.
«Maks Boqaev qylmystyq-atqarý júıesiniń ishinde júrip ózge sottalýshylarǵa keńes nemese kómek berip, quqyq qorǵaý qyzmetimen aınalysyp jatyr. Ol kómekke muqtaj bolǵandardyń eshqaısysyn nazardan tys qaldyrmaıdy. Buǵan búgin mekemege barǵanda kóz jetkizdik», dedi Natalá Kovlágına.
Maks Boqaevtyń qaryndasy Janargúl Boqaeva Azattyqqa aǵasynyń etappen Pavlodarǵa jetkizilgeninen habardar ekenin, biraq ázirge jeke sóılese almaǵanyn aıtty. Ol múmkindik bolsa, Pavlodarǵa aǵasyna baryp qaıtatynyn aıtady.
Qaryndasynyń sózinshe, Maks Boqaevtyń omyrtqasynda jaryq bar jáne ózge de birqatar syrqaty bar. Ol kún sýytqanda jáne densaýlyqqa jaısyz ózge de jaǵdaılarda omyrtqasy qatty syrqyrap aýyratynyn aıtqan. Qaryndasynyń sózine qaraǵanda, klımaty qytymyr Soltústik Qazaqstannyń bıyl qystaǵy qatty aıazynda Maks Boqaev ózge tutqyndar sıaqty ony da tańǵy jattyǵýǵa shyǵarǵan kezde omyrtqasyna sýyq tıgizip alǵan. Ol álgi «prosedýralardan» bas tartqan, biraq sol úshin birneshe márte jazaǵa tartylyp, buryn aıyp kamerasy (SHIZO) dep atalǵan tártiptik oqshaýlaý kamerasy (DIZO) - karserde uzaq ýaqyt otyrǵan. Qaryndasynyń sózinshe, sonyń saldarynan bıyl qysta Maks Boqaevtyń omyrtqasynyń syrqyraýy kópke deıin basylmaǵan.
Atyraýlyq azamattyq belsendiler, «jer mıtıńisine» qatysqan Maks Boqaev pen Talǵat Aıandy 2016 jylǵy qarashada sot atyraýlyq belsendiler «áleýmettik arazdyq týdyrdy», «jalǵan aqparat taratty» jáne «mıtıń ótkizý zańdaryn buzdy» dep tanyp, bes jylǵa bas bostandyqtarynan aıyrýǵa úkim etken. Eki belsendi de ózderine taǵylǵan aıyptyń saıası astary bar dep málimdep, ony moıyndaýdan bas tartqan. Halyqaralyq quqyq qorǵaý uıymdary Qazaqstan bıligin túrmedegi belsendilerdi bosatýǵa talaı márte shaqyrǵan.
