16 sáýir kúni Almaty oblysynda 2017-2021 jyldarǵa arnalǵan Nátıjeli jumyspen qamtý jáne jappaı kásipkerlikti damytý baǵdarlamasy aıasynda «Bastaý» jobasy boıynsha oqytý bastaldy. Odan buryn 14-15 sáýir kúnderi úmitkerler úshin testileý uıymdastyryldy. Emtıhan qorytyndysy boıynsha 864 aýyl azamaty oqýǵa qabyldandy.

Qazirgi tańda «Bastaý» jobasy boıynsha kásipkerlik negizderi boıynsha bilim berý 16 aýdan ortalyǵynda júrgizilýde.

««Bastaý» jobasynyń birinshi aǵymynda 800-den astam adam bar. Aýdandarda bizdiń bıznes-trenerler alǵashqy sabaqtaryn bastap ketti. Taldyqorǵan, Tekeli, Qapshaǵaı qalalarynda oqytý shilde aıynda josparlanǵan», -  dep atap ótti Almaty oblysy Kásipkerler palatasy Kásipkerlikke qarjylyq emes qoldaý kórsetý bóliminiń basshysy Erlan Datqaev.

Jalpy bıyl óńirde oqytýmen 3,3 myńnan adamdy qamtý josparlanyp otyr.

«Bastaýǵa» jumyssyzdar men ózin-ózi qamtyǵan azamattar jáne isin keńeıtýge maqsat qoıǵan jumys istep júrgen kásipkerler qatysa alady. Qatysýǵa ótinim Jumyspen qamtý ortalyǵy arqyly qabyldanady jáne úmitkerler testileýden ótedi. Sonyń nátıjesi boıynsha oqýǵa qabyldanady.

Oqytý baǵdarlamasy 12 modýlden turady. Qatysýshylarǵa salyq rejımderi, zańnama, marketıń negizderi, bıznes salasyndaǵy suranystaǵy baǵyttar jáne t.b. bilim beriledi. Sonymen birge, tájirıbelik sabaqtar, kásipkerlik obektilerin aralaý, tabysty bıznes ókilderimen kezdesý uıymdastyrylady. Bir aılyq kýrsta otandyq bıznes-trenerler sabaq beredi. Sonymen birge qatysýshylarǵa baǵdarlama boıynsha shákirtaqy tólenedi.

Aıta keteıik, «Bastaý» boıynsha oqytýǵa qatysqan azamattar 6%-pen 18 mln-ǵa deıin nesıe alý múmkindigine qol jetkize alady.