Sh.Aımanov atyndaǵy «Qazaqfılm» kınostýdıasy túsirgen qysqametrajdy fılmder mamyrdyń 8-i men 19-y aralyǵynda Fransıada ótetin Halyqaralyq Kann kınofestıvaliniń Short Film Corner baǵdarlamasy aıasynda kórsetiletin bolady.

Álemdik qysqa metrli fılmderge arnalǵan Kann festıvaliniń kásibı bólimi – Short Film Corner baǵdarlamasy aıasynda otandyq eki kınotýyndy – «Tyǵylmaq» jáne «Asan» atty fılmder kórsetiledi. Atalǵan baǵdarlamanyń basty maqsaty – kıno álimindegi kásibı kınogerlerdiń basyn qosyp, jas rejıserler men prodúserler, sondaı-aq álemniń túkpir-túkpirinen jınalǵan dıstrıbútorlar arasynda baılanys ornatý. Osy baǵdarlama aıasynda kórsetilgen fılmder halyqaralyq kınofestıvalderge joldama alyp, halyqaralyq seriktester jáne dıstrıbútor tabýǵa múmkindikteri bar.

Bıyl Short Film Corner baǵdarlamasyna qatysýǵa kóptegen eldiń rejıserleri atynan 2000-nan astam tapsyrys kelip túsken. Jyl saıyn ulǵaıatyn bul kórsetkish qysqa metrli fılmderge degen qyzyǵýshylyqtyń artyp kele jatqanyn kórsetedi.  

Aıta ketsek, «Tyǵylmaq» jáne «Asan» fılmderi byltyr «Qazaqfılm» kınostýdıasyndaǵy «Debút» shyǵarmashylyq-óndiristik birlestigi uıymdastyrǵan senarıler konkýrsynda jeńske jetip, óndiriske jiberilgen bolatyn.

Rejıser Venera Qaıyrjanova túsirgen «Tyǵylmaq» fılmi eresekter problemasyna kýá bolǵan eki kishkentaı qyz týraly baıandaıdy. Olar sol jaǵdaıdan qashyp, óz balalar álemine jasyrynamyz dep, kóshede «tyǵylmaq» oınaıdy.

Bul týyndy Sankt-Peterbor qalasynda ótken V halyqaralyq «Intonnasıa» dybys rejıserlerge arnalǵan kınofestıvalde Grıgorıı Frank atyndaǵy arnaıy júldemen marapattaldy (fılmniń dybys rejıseri Qoıshyn Qanaı).

Al rejıser Berik Jahanovtyń «Asan» fılminde kóp jyldary ákesin kórmese de, ony aqtyq saparǵa shyǵaryp salýǵa barǵan jigittiń ómiri sýretteledi.