QR Bas prokýratýrasy kúshine engen úkimderdiń zańdylyǵyn jáne olardyń oryndalýyn qadaǵalaý qyzmetiniń basshysy Qaırat Jaqypbaev "Astana EKSPO-2017" basqarma eks-tóraǵasy Talǵat Ermegıaevtiń kolonıadaǵy "jaıly jaǵdaıy" týraly aıtyp berdi, - dep habarlaıdy Tengrinews.kz.
"Ermegıaevqa qatysty derek boıynsha, ol jerde VIP-kamera degen bolmaǵan, óndiristik aımaqta jumys ýaqytyna arnalǵan kabınet jasaqtalǵan. Túnde ol kamerasynda jazasyn ótegen, al kúndiz oǵan keı jeńildikter jasalǵan. Bul derekke qatysty qylmystyq is qozǵaldy, tergeý júrip jatyr, qyzmetkerler jumysynan bosatyldy. İİM-de aýqymdy tekseris júrgizildi, 16 laýazymdy tulǵa jazalandy, ekeýi jumystan bosatyldy", - deıdi Jaqypbaev vedomstvoda ótken baspasóz máslıhaty kezinde.
Onyń sózinshe, tergeý qorytyndysyna qatysty Qazaqstan boıynsha tekseris júrgizildi.
"Qańtarda barlyq mekemeni tekserýden ótkizdik. Buǵan uqsas jaǵdaı bolǵan joq. Degenmen keı adamdardan telefon, turmystyq tehnıka, jıhaz sıaqty dúnıeler tárkilendi. Qazir mundaıdy baqylýda ustap otyrmyz, ary qaraı da tekserip turamyz", - deıdi vedomstvo ókili.
Munyń aldynda İİM ókilderi Astana irgesindegi ES-166/10 túzeý mekemesinde Ermegıaevqa jaıly jaǵdaı jasaǵan laýazymdy tulǵalardyń jazalanǵanyn málimdegen.
Eske salaıyq, 2016 jyldyń maýsymynda "Astana EKSPO-2017" basqarmasynyń burynǵy basshysy Talǵat Ermegıaev asa iri kólemde aqsha jymqyrǵany úshin 14 jylǵa bas bostandyǵynan aıyrylǵan.
