«Qazaqınvest» memlekettik kompanıasynyń qyzmeti sheteldiktermen ótken kezdesýler sany boıynsha emes, naqty tartylǵan ınvestısıalardyń negizinde baǵalanýy tıis – bul týraly Azat Perýashev 2018-2020 jyldarǵa arnalǵan respýblıkalyq búdjetke ózgerister men tolyqtyrýlar engizý týraly zań jobasyn talqylaý barysynda málimdedi.

«Aq jol» fraksıasy memlekettik organdar búdjettik baǵdarlamalardyń oryndalýyn baǵalaýǵa asa jaýapty kózqaraspen qaraýǵa tıis dep sanaıdy. Oǵan dáıek retinde ınvestısıalardy tartýǵa jumsalǵan shyǵyndar kórsetildi.

Dýbaıdaǵy, London jáne Nú-Iorktegi «Qazaqınvest» aksıonerlik qoǵamynyń úsh ókili men 3 kómekshi asıstentin ustaýǵa búdjetten 1 mlrd. 100 mln. teńge kóleminde qarjy bólý qarastyrylǵan.

Sonymen birge, aıtpaqshy, «Qazaqınvest» AQ-nyń resmı derekterine súıensek, eń kóp ınvestısıalyq jobalar Qazaqstanǵa jańaǵy atalǵan memleketterden emes, Qytaıdan (61), Reseıden (26) jáne Túrkıadan (20) keledi eken.

«Nelikten ınvestısıalyq belsendilikti ulǵaıtý úshin Qytaı, Reseı nemese Túrkıa elderindegi ókildikter emes, atap aıtqanda, dál sol Dýbaı, London jáne Nú-Iork qalalaryndaǵy ókilder tańdalǵan? – degen saýaldy qoıdy depýtat. - Múmkin, memlekettik kompanıa ókilderine osy laıyqty qalalarda ómir súrýge jáne jumys isteýge qolaıly shyǵar, alaıda óz jeke basynyń sýbektıvti qalaýyna emes baǵyt-baǵdardy tańdaýda seriktesterdiń naqty ınvestısıalyq belsendilikterine súıene otyryp áreket etý kerek bolatyn».

Budan basqa, «aqjoldyqtardy» tańqaldyrǵany – sol sheteldegi ókilderdiń jumysy qandaı jolmen, qaıtip baǵalanatyny. Sóıtse, úkimet olardyń atqaryp jatqan jumysyn tabysty dep moıyndaý úshin sheneýnikter bir jyl ishinde ınvestorlarmen alǵashqy 10 kezdesýdi, ózara baılanysty ári qaraı damytý maqsatynda taǵy bir 10 ret basqosý, bıznestik is-sharalarǵa qatysý, eki áleýetti ınvestorlardyń Qazaqstanǵa is-saparmen kelýin ótkizý jáne de qarqyndy, áleýetti ınvestorlarmen kem degende eki memorandýmǵa qol qoıý sıaqty jumystardy júzege asyrý qajet eken.

«Jarıalanǵan jahandyq jospardyń aıasynda bul – tipten kóńilge qonbaıtyn dúnıe, senimsizdik týdyrady», - dedi depýtat. - Meniń oıymsha, jyldyń 220 jumys kúniniń ishinde kásipkerlermen bar bolǵany 20 ret kezdesý, onyń ústine memlekettiń esebinen, aıtarlyqtaı úlken kúsh jumsaýdy qajet etpeıdi.

Alaıda, nelikten bul ókilderdiń bizdiń elimizge naqty qandaı kólemde ınvestısıalar tartýy qajet ekeni týraly birde-bir sóz aıtylmaǵan?»

Azat Perýashev elge tartylǵan ınvestısıalardan túsetin kirister, tutastaı alǵanda Qazaqstan ekonomıkasyna degen paıdasyn aıtpaǵannyń ózinde, eń bolmaǵanda, mundaı sheteldik ókildikterdi qoldaý úshin búdjetten bólingen shyǵyndardyń ornyn toltyrýy tıis ekenin basa aıta otyryp, «Qazaqınvest» ulttyq kompanıasynyń ókilderine osyndaı talaptardy engizýdi usyndy.