Barsha musylman qaýymy úshin qasıetti Ramazan aıy qarsańynda Memleket basshysy elordalyq «Saryarqa» aýdanynda ornalasqan jańa meshitke bardy, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Prezıdentke meshittiń salyný barysy, sondaı-aq osy ǵımaratty elektr qýatymen jáne jylýmen qamtamasyz etý úshin paıdalanylatyn balamaly energıa kózderi jóninde málimdeldi.

Esil ózeniniń oń jaǵalaýynda ornalasqan meshittiń qurylysy 2016 jyly bastaldy. Jańa meshit qaıyrymdylyq maqsatpen jınalǵan qarajat esebinen turǵyzyldy. Meshit ǵımaraty dástúrli órnekter men dekoratıvti elementter qoldanyla otyryp, postmodernızm stılinde salynǵan. Negizgi ǵımarat kúrdeli ári jartylaı sferalyq nysandy elestetedi. Onyń qabyrǵalary úshburyshtana súıirlenip, dıametri 26 metrlik kúmbezben jalǵasqan. Meshittiń syrtqy dızaıny gúldi ári almastyń qyrlaryn eske salady.

Meshittiń basty ǵımaratynyń soltústik jaǵynda ornalasqan munaranyń bıiktigi – 43,5 metr. Ol «qalam» – «qasıetti qaýyrsyn» túrinde boı kótergen.

Jańa meshitti energıa qýatymen qamtamasyz etý úshin paıdalanylatyn balamaly energıa kózderi qajetti mólsherden úsh ese kóp elektr qýatyn óndiredi. Jańa meshit 750 adamǵa laıyqtalǵan.

Meshit ǵımaratynyń aýdany – 2248 sharshy metr. Ornalasqan jerdiń aýdany – 1,44 ga.