Májiliste depýtattar bastamashy bolǵan gaz jáne gazben jabdyqtaý týraly zań jobasy boıynsha túzetýler maquldandy. Bul jaıynda QR Parlamenti Májilisi Apparatynyń Baspasóz qyzmeti málimdedi.
Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta depýtattar «Gaz jáne gazben jabdyqtaý týraly» Zań jobasyna túzetýlerdi maquldady.
Bul qujatqa Májilis depýtattary ózderi bastamashy bolǵan edi. Oǵan suıytylǵan munaı gaz naryǵyndaǵy ahýal sebep bolyp otyr. Bul gazdy negizinen elimizdiń taýarlyq gazben gazdandyrylmaǵan óńirlerindegi turǵyndar men kásiporyndar tutynady, sondaı-aq, kólik quraldaryna paıdalanady.
Bizdiń elimizde atalǵan zańǵa sáıkes, suıytylǵan gazdyń bekitilgen shekti kóterme saýda baǵasy búgingi kúni, qosylǵan qun salyǵyn esepke almaǵanda, tonnasy 38437 teńgeni quraıdy. Usynylyp otyrǵan zań jobasynyń maqsaty – suıytylǵan munaı gazyn shyǵarý kólemin arttyrýǵa óndirýshilerdiń qyzyǵýshylyǵyn týdyrý arqyly suıytylǵan munaı gaz tapshylyǵyn bolǵyzbaý. Ol úshin sıfrlandyrý jáne bıznes úshin ákimshilik kedergilerdi qysqartý boıynsha júrgizilip jatqan saıasat sheńberinde shyǵynmen jumys istep otyrǵan zaýyttarǵa suıytylǵan munaı gazyn ishki naryqqa berýdi engizgennen keıin elektrondyq saýda alańdary arqyly olardyń kiristiligin qamtamasyz etý kózdelgen.
Depýtattar ázirlegen túzetýler bul tetikterdi 2019 jyldan bastap, 2021 jylǵa deıin kezeń-kezeńmen engizýdi qamtıdy.
Jalpy otyrysta halyq qalaýlylary «Qazaqstan Respýblıkasyndaǵy saılaý týraly» Konstıtýsıalyq zańǵa túzetýler engizýge qatysty Konstıtýsıalyq zań jobasyn jumysqa qabyldady. Qujat jańa ınstıtýttardy engizý, quqyqtyq olqylyqtar men qaıshylyqtardy joıý arqyly saılaý zańnamasyn jetildirýge baǵyttalǵan. Konstıtýsıalyq zańǵa usynylyp otyrǵan túzetýler barynsha ashyq ári demokratıalyq saılaý prosesin qamtamasyz etýge yqpal etpek.
Bul rette saılaý máseleleri boıynsha túzetýlerge qatysty zań jobasy da jumysqa alyndy.
Osy kúni Májiliste birqatar zańnamalyq aktiler ekinshi oqylymda maquldandy. Onyń ishinde, komersıalyq emes uıymdardyń qyzmetine qatysty zań jobasyn ekinshi oqylymǵa daıyndaý barysynda qoldanystaǵy zańnamaǵa, zań tehnıkasy qaǵıdalaryna sáıkes keltirýge baǵyttalǵan redaksıalyq-naqtylaý sıpatyndaǵy túzetýler engizilgen.
Aıta keterligi, «Atameken» Ulttyq kásipkerler palatasynyń qurylýyn jáne jumys isteýin qamtamasyz etý úshin osy Zań qoldanysqa engizilgen kúnnen bastap 5 jylǵa deıingi ótpeli kezeń atalǵan Zańmen belgilendi, bul kezeń ótkennen keıin Úkimet UKP qatysýshylarynyń quramynan shyǵady.
Osyǵan baılanysty Májilis depýtattary UKP-nyń Úkimetpen jáne memlekettik organdarmen ózara is-qımylynyń jańa nysanyn engizýge, óńirlik palatalarda aýdandyq keńester, salalyq keńester qalyptastyrý úshin quqyqtyq negiz qurýǵa, Úkimet ókilderiniń Ulttyq kásipkerler palatasynyń basqarý organdary – Sıez jáne Tóralqa jumysyna qatysýy týraly normany alyp tastaýǵa qatysty túzetýler usyndy.
Sondaı-aq, osy kúni Palata saqtandyrý jáne saqtandyrý qyzmetine túzetýlerdi, sonymen qatar, valútalyq retteý jáne valútalyq baqylaý týraly jáne oǵan ilespe zań jobalaryn ekinshi oqylymda maquldady.
Jalpy otyrysta 1992 jylǵy 6 shildedegi TMD Ekonomıkalyq Sotynyń mártebesi týraly kelisimge ózgerister engizý týraly hattama depýtattar tarapynan qoldaýǵa ıe bolyp, Qazaqstan men Qytaı úkimetteri arasyndaǵy bizdiń elge tikeleı ınvestısıalar salýdy júzege asyratyn Qytaı-Qazaqstan óndiristik qýattarynyń yntymaqtastyǵy qory kirisiniń jekelegen túrlerin salyq salýdan bosatý týraly kelisimdi ratıfıkasıalaý boıynsha beıindi komıtetterge qorytyndy ázirleý merzimi belgilendi.
