Memleket basshysy Qytaı Halyq Respýblıkasyna memlekettik sapary barysynda Qazaqstan men Qytaıdyń birlesip túsirgen «Kompozıtor» atty birinshi kınofılminiń shyǵarmashylyq tobymen kezdesti. Fılm Uly Otan soǵysy jyldarynda Qazaqstanda bolǵan qytaı kompozıtory Sı Sınhaı men qazaq kompozıtory Baqytjan Baıqadamovtyń dostyǵyna arnalǵan.  

Qazaqstan Prezıdenti fılm treıleriniń tanystyrylym rásiminde akterler quramyna kásibı óner kórsetkeni úshin rızashylyq bildirip, eki eldiń mádenı saladaǵy yntymaqtastyǵynyń joǵary deńgeıge kóterilgenin atap ótti. 

Kórkem fılmdi Sh.Aımanov atyndaǵy «Qazaqfılm» kınostýdıasy men Qytaıdyń «Shinework Pictures» jáne «China Film Coproduction Corporation» kompanıalary túsirgen. Basty rólderde qazaqstandyq akterler – Berik Aıtjanov, Altynaı Nógerbek, Arýjan Jazylbekova, qytaılyq akterler – Hý Szún jáne Iýán Súan oınaıdy.