Búgin Beıjińdegi "Dáoıýıtaı" rezıdensıasynda Qazaqstan prezıdenti Nursultan Nazarbaevtyń jáne 300-den astam qytaılyq kásipkerdiń qatysýymen iskerlik keńes otyrysy ótti, dep habarlaıdy Qamshy.kz aqparat agenttiginiń tilshisi.
Otyrys barysynda Qytaı kásipkerleri Elbasyǵa alǵys aıtty. Olardyń sózinshe, memleketter arasyndaǵy saýda-ekonomıkalyq qatynastyń jandanýy – Nursultan Nazarbaevtyń saıasatynyń arqasy.
Óz kezeginde Nursultan Nazarbaev eki eldiń ekonomıkalyq seriktestiginiń nyǵaıyp kele jatqanyna nazar aýdardy.
– Keshegi ótken kelissózder barysynda saýda qarym-qatynasyn jalǵastyratynymyzdy málimdedik. Óndiristik keshenderdi damytýǵa Qytaı kompanıalaryn shaqyramyz. Qazaqstan jańa ınovasıalyq tehnologıa salasyn jedel damytý sharalaryn qolǵa aldy. Osy maqsatta Qazaqstanda "Sıfrly Qazaqstan" baǵdarlamasy júzege asyrylady. Ekonomıkany sıfrlandyrý maqsatynda ınovasıalyq jobalardy júzege asyrý asa mańyzdy. Osyǵan oraı elimizde "Nazarbaev ýnıversıteti" syndy ınovasıalyq klaster jumys istep tur. Bıyl halyqaralyq IT-startap tehnoparki ashylady, - dedi Nazarbaev.
Buǵan qosa Elbasy agrarlyq saladaǵy yntymaqtastyq nyǵaıyp kele jatqanyn, Qytaıǵa eksporttalatyn aýylsharýashylyǵy ónimderiniń kólemi ulǵaıatynyn jetkizdi. Qytaı ınvestorlarynyń Qazaqstanda jumys isteýine barynsha tıimdi jaǵdaı jasalatynyn aıtty.
– Búgingi kezdesý qos memlekettiń arasyn odan ary jaqyndastyra túsetinine senimdimin. Kompanıalar men kásipkerlerimiz bıznestiń damýy men ózara yntymaqtastyqtyń nyǵaıýy jolynda aıanbaı eńbek etýi kerek, - dedi Qazaqstan prezıdenti.
"Samuryq-Qazyna" ulttyq ál-aýqat qorynyń basqarmasy tóraǵasy Ahmetjan Esimov eki eldiń bıznestegi áriptestigi áli de kúsheıetinin atap ótti.
– Búgingi iskerlik keńes otyrysynda 4 saǵat boıy kóp áńgime aıtyldy. Qurmetti Nursultan Ábishuly, sizdiń QHR basshysymen keshegi kelissózderińizdi negizge alyp, biz jaqyn arada qytaılyq áriptesterimizben "Bir beldeý – bir jol" jáne "Nurly jol" baǵdarlamasy aıasynda jańasha baǵytta jumys isteıtin bolamyz, – dedi Esimov.
Aıta keteıik, 6 maýsymda resmı saparmen Beıjińge barǵan Nursultan Nazarbaevty erteńinde Qytaı bıligi Halyq jınalysy úıiniń aldynda saltanatpen qabyldady. Sap túzegen áskerıler Qazaqstannyń Memlekettik ánuranyn orkestrmen oryndap, Nursultan Nazarbaevqa zor qurmet kórsetti.
Shı jın pıń Elbasyna alǵys bildire otyryp, jarqyn bolashaq maqsatynda Qazaqstanmen birge júrýge daıyn ekenin málimdedi. Óz kezeginde Nursultan Nazarbaev ózin qarsy alǵan Qytaı tóraǵasyna alǵys bildirip, quttyqtaý sózin jetkizdi.
Keıin Qazaqstan men Qytaı basshylary jalpy sany 9 qujatqa qol qoıdy.
Bul – eki el basshysynyń 18-shi ret júzdesýi.
