QR Aqparat jáne komýnıkasıa mınıstri Dáýren Abaev «Rýhanı jańǵyrý» logotıpi aıasynda týǵan daýǵa baılanysty jaýap berdi.

Mınıstrdiń sózinshe, logotıp Qazaqstan Respýblıkasynyń memlekettik týynan alynǵan. Ári osy ýaqytqa deıin «Rýhanı jańǵyrý» logotıpiniń fransýzdyq kompanıanyń logotıpine uqsastyǵy týraly eshkim shaǵymdanbaǵan.

"Logotıp plagıat" dep eshkim shaǵym túsirgen joq. Ekinshiden, barlyq qustyń birdeı ekenin, bárinde qanat bar ekenin túsinýimiz kerek", - dedi Dáýren Abaev.

Ári mınıstr memlekettik baǵdarlamany júzege asyrýda memlekettik qyzmetkerlerdiń jaýapkershiligi zor ekenine basa nazar aýdardy.

"Rýhanı jańǵyrý" baǵdarlamasyn júzege asyrýǵa "Rýhanı jańǵyrý" jobalyq keńsesi jaýapty. Onda aqparat mınıstrligimen qosa barlyq memlekettik organ kiredi. Sol sebepti baǵdarlamany júzege asyrýda bárimizdiń jaýapkershiligimiz zor", - dedi Abaev.

Sonymen qatar, ol logotıptiń ózgermeıtinin de málimdedi.

Aıta keteıik, ınternet jelisinde «Rýhanı jańǵyrýdyń» logotıpine qatysty daý týyndap, ony fransýzdyq uıymnyń sýretimen salystyra otyryp, jeli qoldanýshylary birshama synnyń astyna alǵan bolatyn.

Keıin logotıpke qatysty QR Mádenıet jáne sport mınıstri Arystanbek Muhamedıuly óz pikirin bildirdi.

«Meniń oıymsha, bul logotıpten biz uıalmaýymyz kerek. Emblema adamdarǵa rýh syılap, jigerlendiredi. Ózderińiz kórgendeı, sýrette júz paıyz sáıkestik joq. Men ózim kórdim. Keıbir jerlerinde uqsastyqtar bar, árıne, degenmen tústeri ár túrli. Bul máselede bireýdi plagıat jasady dep aıyptaý durys emes dep sanaımyn», - degen edi Arystanbek Muhamedıuly.