Búgin Memleket basshysy Beıjińde CNPC korporasıasy dırektorlar keńesiniń tóraǵasy Van Ilınmen kezdesti, dep habarlaıdy Qamshy.kz aqparat agenttigi.
Nursultan Nazarbaev CNPC kompanıasynyń munaı men gazdy óndirý, tasymaldaý jáne ony qaıta óńdeý salalary boıynsha Qazaqstannyń negizgi áriptesi bolyp sanalatynyna toqtalyp, bul kásiporynnyń elimizdegi jumysyna qanaǵattanatynyn aıtty.
– Jalpy osy jyldar ishinde Qazaqstanda 100 mıllıon tonnadan astam munaı óndirildi. Biz sizdiń kompanıańyzben yntymaqtastyqty jalǵastyrýǵa daıynbyz. Ásirese, «Keńqıaq-Atyraý» munaı qubyryn paıdalaný arqyly ishki naryqqa jáne Qytaıǵa jetkiziletin munaı kólemin arttyra alamyz.
Kompanıa basshysy CNPC-diń Qazaqstandaǵy áriptestermen 20 jyldan astam ýaqyttan beri yntymaqtasa jumys istep kele jatqanyn jáne zor jetistikterge jetkenin aıtty.
– Sizdiń kóńil bólgenińizdiń jáne Qytaı Úkimeti kómeginiń arqasynda aıtýly nátıjelerge qol jetkizdik. Sizge zor qurmetim men rızashylyǵymdy bildirýge ruqsat etińiz. Bizdiń múmkindigimizdiń bar ekenin jáne ony odan ári damytyp, jumys isteýge nıetti ekenimizdi jetkizgim keledi, – dedi Van Ilın.
Kompanıa basshysy Qazaqstan Prezıdentine İskerlik keńes aıasynda júrgizilgen kelissózder men qol qoıylǵan kelisimsharttar jóninde baıandady.
– Úkimetimiz jáne Sı Szınpın myrzanyń jeke ózi qazaqstandyq áriptestermen tyǵyz yntymaqtastyqty jańa deńgeıde damytýǵa múddelilik tanytyp otyr. Bul mindetti oryndaýǵa shamamyz jetetinine kámil senemiz, – dedi kompanıa basshysy.
Aıta keteıik, 6 maýsymda resmı saparmen Beıjińge barǵan Nursultan Nazarbaevty erteńinde Qytaı bıligi Halyq jınalysy úıiniń aldynda saltanatpen qabyldady. Sap túzegen áskerıler Qazaqstannyń Memlekettik ánuranyn orkestrmen oryndap, Nursultan Nazarbaevqa zor qurmet kórsetti.
Shı jın pıń Elbasyna alǵys bildire otyryp, jarqyn bolashaq maqsatynda Qazaqstanmen birge júrýge daıyn ekenin málimdedi. Óz kezeginde Nursultan Nazarbaev ózin qarsy alǵan Qytaı tóraǵasyna alǵys bildirip, quttyqtaý sózin jetkizdi.
Keıin Qazaqstan men Qytaı basshylary jalpy sany 9 qujatqa qol qoıdy. Al búgin Beıjińdegi "Dáoıýıtaı" rezıdensıasynda Qazaqstan prezıdenti Nursultan Nazarbaevtyń jáne 300-den astam qytaılyq kásipkerdiń qatysýymen iskerlik keńes otyrysy ótti. Otyrysta eki jaqty saýda-ekonomıkalyq yntymaqtastyqtyń mańyzy ári ony odan ary nyǵaıtý máselesi sóz boldy.
