AQSH prezıdenti Donald Tramp Qytaıdan ımporttalatyn 50 mıllıard dollardyń taýaryna baj salyǵyn salýdy bekitti dep habarlady óz derekkózderine silteme jasaǵan Associated Press (AP) agenttigi.

AP málimetinshe, Tramp bul týraly sheshimin ulttyq qaýipsizdik jónindegi keńesshileri jáne AQQ Qarjy mınıstrligi men Saýda mınıstrliginiń ókilderimen keńesken soń qabyldaǵan.

Qytaıdan jetkiziletin taýarlarǵa 25 paıyz baj salyǵy salynady. Jańa erejeniń qashan kúshine enetini ázirge aıtylmaıdy.

Wall Street Journal (WSJ) basylymynyń aqparatynsha, salyq salynatyn qytaılyq taýarlar tizimi 15 maýsymda jarıalanady. Basylym derekkóziniń málimetine qaraǵanda, tizim jobasynda 1300 taýardyń ataýy bar.

Qytaı buǵan deıin AQSH prezıdenti eger baj salyǵyn salsa, onda jaýap sharalaryn qabyldaıtynyn eskertken.

31 mamyrda AQSH Eýropa Odaǵy, Meksıka jáne Kanadadan jetkiziletin alúmını jáne bolatqa baj salyǵy salynatynyn jarıalaǵan. 1 maýsymnan bastap bul elderden ákelinetin bolatqa 25 paıyzdyq, alúmınıge 10 paıyzdyq baj salyǵy salynady. Brússel AQSH-tyń bul saıasatyn "proteksıonızm" dep atap, 20 maýsymǵa deıin jaýap sharalaryn jasaıtynyn málimdegen.