Túrkıalyq dárigerler balamdy bermeı jatyr!  Almatylyq kelinshek Dará Vasıleva buqaradan kómek suraýda. Ol osydan bir aı  buryn Anadoly elinde otbasymen demalyp júrip, merziminen erte  bosanyp qalǵan. Alaıda, sábı shala-jansar týylǵandyqtan sheteldik  aq halattylar ony ınkýbatorǵa ornalastyryp, kúnine 3,5 myń dollardan aqsha tóleýin talap etken. Qomaqty qarajatty qaltasy kótermegen kelinshek amalsyz balasyn tastap elge oraldy. Biraq, Túrkıa tarapy basqa ýáj aıtyp otyr! Bul týraly Eýrazıa birinshi arnasy habarlaıdy. 
 
Oqıǵa maýsymnyń 29-nan 30-na qaraǵan túni bolǵan. Demalysta júrgen Darányń kenetten ishi búrip sala beripti. 

Otaǵasy jedel-járdem shaqyrǵanymen birden kele qoımapty.Tańǵa jaqyn óz kúshterimen aýrýhanaǵa tartyp otyrady. Alaıda, tolǵaǵy qysqan kelinshek orta jolda  bosanyp qoıady.

«Aýrýhanaǵa deıin jetip úlgermedik.Janarmaı beketinen toqtadyq! Men sol jerde bosandym. Óz betimmen! Sosyn sonda jedel-járdem qyzmetkerlerin shaqyrttyq!» - deıdi qala turǵyny Dará Vasıleva.

Shala týǵan shaqalaqtyń salmaǵy nebary 750 gram.

Ony túrik dárigerleri ınkýbatorǵa salyp, Antaládaǵy aýrýhanaǵa jóneltedi. Biraq ondaǵy bir kúndik qyzmet quny 3.5 myń dollar. Bul qarajatty Almatylyq otbasynyń qaltasy kótermeıdi, al Túrkıa tarapy aqshany tólemeseńder balany bermeımiz dep qoqan-loqy kórsetipti.  

«25 shilde kúni men tóleýimiz tıis qarajat turaly málimet aldyrttym. Oǵan saı biz klınıkaǵa 15 myń dollar qaryz ekenbiz. Al, bizdiń medısınalyq saqtandyrý fırmasy bul shyǵyndy óteýge qaýqarsyz. Nede bolsa biz balamyzdy alyp ketemiz. Bul bizdiń kópten kútken alǵashqy nárestemiz!» - deıdi qala turǵyny Dará Vasıleva.

Alaıda máselege aralasqan jaýapty mınıstrlik oqıǵanyń anaý aıtqandaı emestigin habarlady. Túrkıalyq dárigerler olarǵa Dará náresteden ózi bas tartqandyǵyn jetkizipti. Óıtkeni, shala týǵan shaqalaqtyń adam bolyp ketýine kúmándanǵan. 

«Qazirgi ýaqytta bala sol aýrýhanada jatyr.Jaǵdaıy jaqsy!Biraq, arnaıy kútim qajet. Ata-anasy tıisti qarajatty tólegennen keıin Qazaqstanǵa alyp ketýge bolady» - QR Syrtqy ister mınıstrliginiń ókili Aıbek Smadıarov.

Kelinshektiń keraǵar áreketi boldy ma? Ol jaǵy ázirge belgisiz. Anyǵy elimizdiń syrtqy ister mınıstrligi kómek kórsetýge daıyn. 

Sondaǵy konsýl Antaládaǵy aqshaqumar aýrýhana basshylyǵymen kezdesýdi uıymdastyryp bermek. Balanyń qujattaryn rásimdeý máselesin de mınıstrlik óz moınyna alyp otyr.