Shymkentte bir top sottalǵan azamat túrmedegi zańsyzdyqtardyń betin ashty. Tipti óz sózderi dáleldi bolý úshin jabyq mekemeniń kamerasynda otyryp, vıdeoúndeý jarıalady dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp.
Kameraǵa uıaly telefon kirgizýdyń quny — 100 myń teńge
Shymkenttegi ICH 167/11 túzeý mekemesindegi jaǵdaıǵa kóńili tolmaǵan sottalýshylar birneshe ret quzyrly organdarǵa shaǵym túsirgen.
Alaıda ol shaǵym ishten shyqpaı, esh nátıje bolmaǵan soń úsh azamat túrmedegi bylyqtardy jurtqa jarıa etpek bolyp, bárin beınetaspaǵa túsirgen. Aıtýlarynsha, abaqty ishinde kóp suraqty aqshaǵa sheshýge bolady. Mekeme qyzmetkerleri tipti ózderi ishke uıaly telefon kirgizip berýge usynys tastaǵan. Tek baılanys quralyn kameraǵa kirgizý úshin olar qomaqty qarjy alyp otyrǵan.
"Myna telefondy satyp aldym. Jalpy 100 myń teńge berdim. Aldynda taǵy bir osyndaı "prostoı" telefon kirgizip bergen maǵan. İstemeı qaldy da, sosyn ony sýǵa aǵyzyp jiberdik. Bári biledi bizdiń telefonmen sóılesetinimizdi. Mine, qýattyǵyshy. Artynda taǵy da SIM kartalarym bar",-deıdi sottalýshylardyń biri.
Baılanys quralyn jetkizip berýshi jazasyn óteýshilerdiń qyzmeti úshin alatyn aqysynyń qymbat ekenin aıtqanda: "Biz bastyq ekeýmiz bul aqshanyń barlyǵyn qaltamyzǵa tyǵady deısińder me? Bizdiń de beretin jerlerimiz bar" dep jaýap qatypty.
Karta bıznesi órship tur
Vıdeoda jazasyn óteýshiler óz sózderi dáleldi bolsyn dep qoldaryndaǵy bir-bir uıaly telefondaryn kórsetedi. Ol az degendeı, jabyq mekemesinde karta bıznesi týraly sóz qozǵaıdy. Sottalýshylar túzeý mekemesiniń qyzmetkerlerin qumar oıyn arqyly ońaı tabys taýyp otyr dep aıyptady.
"Jazamdy ótep jatqan kezde Jalǵasbaev Ermek maǵan kelip, "kartaǵa oıyn uıymdastyryp, maǵan ishten aqsha shyǵaryp bershi" dedi. "Iá"dep alyp aldym da, sizderge zańsyz is-áreketterin dáleldep berip jatyrmyn. "Úshten birin maǵan, úshten birin "vor v zakone"-larǵa jiberip otyrasyń" dedi. "Iá-ıá" dedim, "olarǵa myna novyı SIM kartamen zvonda" dep ákep berdi. Men eshkimge zvondamaı, sizderge dáleldep otyrmyn", — deıdi jazasyn óteýshi beınejazbada.
"Joǵarǵy sot pen Bas prokýratýradan arasha suraımyz"
"Biz shyndyqty aıtyp jatyrmyz. Sottalǵandar telefondy, kartany, geroındy, anashany qaıdan alady deısizder? Mine, ózderi aqshaǵa alyp kelip beredi. Onda myna úsh telefondy qalaı kirgizemiz? Shymkent qalasy Sáýle aýdanyndaǵy ICH167/11 túrmesinde mine jaǵdaı osyndaı" dep janaıqaıyn jetkizgender túrme kameralarynda turmystyq zattar tek qaǵaz júzinde dep otyr. Tamaq máselesinde de tıisti as-aýqat berilmeıdi degen túrmedegiler beınetaspany QR Joǵary soty men Bas prokýratýra, UQK sekildi quzyrly organdar kórse, tekserý sharalaryn júrgizedi degen úmitin jetkizdi.
Zańsyzdyqtar rastaldy
Tórt qabyrǵanyń ishinde otyrǵandardyń janaıqaıyna qatysty mán-jaıdy bilý úshin Shymkent qalasy boıynsha qylmystyq-atqarý júıesi departamentine resmı hat joldap, jaýabyn aldyq. Departament basshysy Atelbek Dosmaǵambetov bul keleńsiz jaǵdaıdy joqqa shaǵarmady. Túzeý mekemesinde tintý sharalary júrgizilip, tyıym salynǵan zattar tárkilenip alynǵan. Al sottalýshylar zańsyz áreketterin tizip shyǵyp, áshkere etken mekeme qyzmetkerleri tártiptik sharamen ońaı qutylyp ketken.
"Beınejazbada aıtylǵan qyzmetkerlerge qatysty qyzmettik tekserý júrgizilip, nátıjesinde osy faktige qatysy bar dep tanylǵan qyzmetkerler men sottalǵandarǵa qatysty tártiptik sharalar qoldanyldy", — dep jazylǵan departamenttiń jaýabynda.
Sondaı-aq, ishki ister departamentindegiler túrmedegi rejımdi qaskóılikpen buzýshy dep tanylǵan sottalǵandardyń bul is-áreketteri arqyly qylmystyq-atqarý júıesi mekemesi ákimshiliginiń bedeline nuqsan keltirmek bolǵanyn atap ótken. Olar bolǵan jaǵdaıǵa ókinish bildiretinin jazbasha túrde rastapty.
