Denıs Tenniń ólimi boıynsha istegi kúdikti Janar Tolybaeva mas kúıde kólik júrgizgeni úshin júrgizýshi kýáliginen aıyrylǵan, - dep habarlaıdy Tengrinews.kz.

QR Joǵarǵy sotyndaǵy sot aktileriniń bazasyndaǵy materıaldarǵa súıensek, 2018 jyldyń 7 sáýirinde saǵat 3.30-da Janar Tolybaeva Jibek joly men Qazybek bı kósheleriniń qıylysynda mas kúıde "Kia Shuma" kóligimen kele jatqan.

Nátıjesinde kúdikti QR Ákishilik quqyq buzýshylyq týraly kodekstiń 608-babynyń 1-bóligi boıynsha ("Júrgizýshiniń kólik quralyn alkogóldik, esirtkilik jáne (nemese) ýytqumarlyq masań kúıde basqarýy, sol sıaqty kólik quralyn alkogóldik, esirtkilik jáne (nemese) ýytqumarlyq masań kúıdegi adamnyń basqarýyna berý") ákimshilik jaýapkershilikke tartylǵan. 

Cot otyrysynda ol kinásin moıyndady.

Jambyl oblysy Qordaı aýdandyq soty Janar Tolybaevany úsh jylǵa kólik júrgizý quqyǵynan aıyrý týraly sheshim shyǵarǵan.

Aıta keteıik, 22 jastaǵy Janar Tolybaeva Denıs Tenniń ólimi boıynsha iste úshinshi kúdikti retinde ótip jatyr. 27 shildede ol 2 aıǵa qamaýǵa alynǵan bolatyn. İİM basshysy Janar Tolybaevanyń Jambyl oblysynan kelgenin jáne Almatyda daıashy bolyp jumys istegenin aıtqan edi.

Eske salaıyq, 19 shildede Almatyda belgisiz bireýler Denıs Tendi pyshaqtap ketken bolatyn. Oqıǵa shamamen 15.00-de Qurmanǵazy men Baıseıitova kósheleriniń qıylysynda bolǵan. Keıin qalalyq İİD ókilderi Denıs Tenge avtourylar shabýyl jasaǵanyn málimdedi. Sóıtsek, sportshy urylardyń ústinen túsken bolyp shyqty. Janjal kezinde sportshynyń aıaǵyna pyshaq tıip, kóp qan joǵaltqan. Ol aýrýhanada kóz jumdy.