Bas Prokýrordyń tóraǵalyq etýimen Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysy ótti, onda qylmystyq prosesti sıfrlandyrý, sondaı-aq quqyq qorǵaý qyzmetiniń prosestik negizderin jańǵyrtý máseleleri talqylandy, dep habarlaıdy Qamshy.kz aqparat agenttigi QR Bas prokýratýranyń baspasóz qyzmetine silteme jasap.

İs-sharaǵa Premer-Mınıstrdiń orynbasary Asqar Jumaǵalıev, Prezıdent Ákimshiliginiń, Úkimettiń ókilderi, qarjy mınıstri, Úılestirý keńesiniń músheleri qatysty.

Memleket basshysynyń «Sıfrly Qazaqstan» baǵdarlamasy sheńberindegi tapsyrmasyna sáıkes elimizde qylmystyq sot isin júrgizý elektrondy formatqa kezeń-kezeńmen kóshirýdiń júzege asyrylyp jatqany atalyp ótti.

Jobany iske asyrýdyń basty maqsaty – azamattardyń quqyqtaryn qorǵaý jáne sot tóreligine jyldam qol jetkizýdi qamtamasyz etý.

Avtomattandyrý qylmystyq prosestiń barlyq satysyn: qylmysty tirkeýden bastap úkim oryndalǵanǵa deıin qamtıdy dep kútilýde.

İsterdi elektrondy formatta tergep-tekserýdiń artyqshylyǵy – ońtaılandyrý, dáleldemelerdi jınaý jáne prosestik qujattardy jasaý rásimderiniń jeńildetilýi, sondaı-aq prokýrorlyq jáne sot baqylaýynyń kúsheıýi.

Búgingi tańda 5 myńǵa jýyq is elektrondy túrde tergep-tekserilýde, onyń  2,3 myńy sotqa joldanǵan.

Úılestirý keńesiniń tóraǵasy – Bas Prokýror Qaırat Qojamjarov atap ótkendeı, elektrondy sot isin júrgizýdi tolyqqandy engizý úshin qylmystyq qýdalaý organdaryn qarjylandyrý, tıisinshe tehnıkalyq jaraqtandyrý jáne qyzmetkerlerge ony júrgizý daǵdylaryn oqytý máselelerin sheshý qajet.

Osyǵan baılanysty, Úkimet músheleri jobany odan ári iske asyrý úshin qarajat bólý máselesin talqylady, al quqyq qorǵaý organdarynyń basshylaryna qylmystyq prosesti kezeń-kezeńmen avtomattandyrý merziminiń múltiksiz saqtalýyn qamtamasyz etý tapsyryldy.

Odan keıin qylmystyq proseste azamattardyń qorǵalý deńgeıin kóterý, onyń ásire qatańdyǵyn tómendetý, qylmystyq sot isin júrgizý nysandaryn ońtaılandyrý boıynsha ýákiletti organdar qabyldap jatqan sharalar týraly baıandamalar tyńdaldy.

Mysaly, qylmystyq jáne qylmystyq-prosestik zańnamany jańǵyrtýǵa baǵyttalǵan Zań qoldanysta bolǵan 7 aı ishinde ustalǵandar (9 789-dan 6 508-ge deıin), kúzetpen ustalǵandar (8 835-ten 6 148-ge deıin) jáne bas bostandyǵynan aıyrýǵa sottalǵandar (12 414-ten 4 231-ge deıin) sany úshten bir bóligine azaıǵan.

Azamattardyń konstıtýsıalyq quqyqtaryn qorǵaý maqsatynda sotqa barlyq tergeý áreketterin sanksıalaý boıynsha ókilettikterdi kezeń-kezeńmen berý aıaqtaldy.

Aǵymdaǵy jyldyń naýryzynan bastap sottar jasyryn tergeý áreketterin júrgizýge 8 myń sanksıa bergen.

Buıryqtyq is júrgizý tártibimen 600-den astam is aıaqtalǵan.

Bas Prokýror jasyryn tergeý áreketterine bastama jasaý kezinde zańdylyqtyń jáne azamattardyń quqyqtarynyń buzylýyna jol berilmeýine, azamattardy negizsiz ustaý faktilerin boldyrmaýǵa, dáleldemelerdi jınaý boıynsha advokattardyń ókilettikterin iske asyrý kepildiginiń qamtamasyz etilýine aıryqsha kóńil aýdardy.

Úılestirý keńesiniń qorytyndysy boıynsha birqatar naqty usynymdar ázirlendi.