Eýropalyq komısıa Ilon Maskqa tıesili X áleýmettik jelisinde qoldanylatyn Grok jasandy ıntellekt chat-botyna qatysty resmı tergeý bastady. Tergeýge sebep – chat-bottyń áıelder men kámeletke tolmaǵandarǵa qatysty ruqsatsyz, seksýaldyq sıpattaǵy dıpfeık sýretterdi jasaýǵa múmkindik berýi jónindegi aqparattar.

EO ókilderiniń aıtýynsha, tekserý barysynda Grok pen X platformasynyń Eýroodaqtyń Sıfrlyq qyzmetter týraly zańy (Digital Services Act) talaptaryn oryndaý-oryndamaýy anyqtalady. Bul zań ınternet-platformalardy zańsyz jáne zıandy kontenttiń taralýyn boldyrmaýǵa mindetteıdi.

Eýrokomıssıa tóraıymy Ýrsýla fon der Láıen mundaı áreketterdi «aqylǵa qonymsyz ári qaýipti» dep atap, Eýropa áıelder men balalardy sıfrlyq qorlaý áreketterine eshqashan kóz juma qaramaıtynyn málimdedi. Onyń sózinshe, tehnologıalyq kompanıalar paıda tabý úshin adam quqyǵy men balalar qaýipsizdigin qurban etpeýi tıis.

Aıta keteıik, Grok chat-boty buǵan deıin de synǵa ushyraǵan. Tergeýlerden keıin kompanıa sýret jasaý múmkindigin tek aqyly qoldanýshylarmen shekteýge májbúr boldy. Sonymen qatar Ulybrıtanıanyń medıa retteýshisi Ofcom da X platformasyna qatysty jeke tekserý júrgizip jatyr. Ilon Maskiń eks-qalyńdyǵy da Masktiń Grok platformasyn sotqa bergen.