Almaty qalasyndaǵy «Atakent» saýda ortalyǵynyń aldyna ornatylǵan tıinniń músinin Reseı almaq.

Bul týraly qazaqstandyq jáne sheteldik sáýletshiler men dızaınerler jınalǵan pres-konferensıada aıtylypty. Konferensıa qalany ózgertý boıynsha ótkizilgen. Dıskýssıa barysynda mamandar daýǵa aınalǵan tıindi de sóz etti.

«Alyp tıin jaıly bar álem tanydy. Bizde de ony jıi talqylaıdy. Tipti óner súıer qaýym arasynda ony Reseıge ákelý týraly usynys baryn da estip qaldym», - deıdi sýretshi, dızaıner Andreı Lúblınskıı.

Almatylyqtar túgin qaldyrmaı synaǵan tıindi materıaldyq emes mádenı mura boıynsha IýNESKO sarapshysy, Tengrı halyqaralyq qor basqarmasynyń múshesi Evfrat Imambekke unatqan sekildi. Biraq ózi emes, kózderi.

«Tıinniń ózi sál usqynsyzdaý, esesine kózderi ádemi. Daý-damaıǵa toly bolsa da tıinniń arqasynda bizdi álem tanyp otyr emes pe?» - dedi ol.

Buǵan qosa, Almatyda tıinnen bólek 60 arhıtektýralyq músin ornatylmaq.

Aıta keteıik, shildeniń basynda «Atakent» iskerlik yntymaqtastyq ortalyǵy aldynda alyp tıin ornatyldy. «Tıin» art nysanyn jasap shyǵarǵandar onyń qunyn da aıtyp bergen edi.

Funk kreatıvti agenttiginiń basshysy Maıra Izmaılovanń aıtýynsha, tıinniń quny 23 mıllıon teńgege shyqqan. Onyń 15 mıllıony memleket qarjysynan alynsa, 8 mıllıondy agenttiktiń ózi shyǵarypty.

Al barlyǵy 16 art-nysan bolǵan kórinedi. Báriniń baǵasy 78 mıllıon teńgeni qurady.

Negizinen tıin «Almaty – Jyly qala» jobasy aıasynda salynǵan. Avtory brıtandyq tanymal qoǵamdyq pablık-art sýretshi Aleks Rınsler. Joba bastamashylarynyń pikirinshe, almatylyq «Tıin» qalanyń jańa kórikti jerine aınalyp, turǵyndar men týrıser jınalatyn oryn bolady.