Elbasy kimge senedi? Elbasynyń janynda keı sheneýnikter birneshe jyldan beri jyly oryndaryn ǵana aýystyryp qyzmet atqaryp júr. Elbasynyń senimi men qoldaýynyń arqasynda birqatar sheneýnikter saıası oıynnyń bedeldi oıynshysyna aınalǵan sekildi. Bul shendilerdiń birin halyq aspanǵa kóterip maqtasa, endi birin ashshy tilderimen dattap júr. Qaısysyn maqtap, qaısysyn dattaıtynyn ishińiz biler, ol jaǵyn ózińizge qaldyrdym, qurmetti oqyrman! Alaıda Elbasynyń janynda birneshe jyl boıy qyzmet etkenderdiń qatarynda kimder bar? Qamshy.kz aqparat agenttigi "eski gvardıa" tizimin jınaqtap, oqyrman nazaryna usynýdy jón kórdi.
Imanǵalı Nurǵalıuly Tasmaǵambetov
1956 jyly jeltoqsan aıynda Gýrev (qazirgi Atyraý) oblysy, Mahambet aýdany, Novobogat aýylynda dúnıege kelgen.
Halyqtyń qoshemetine bólengen Imanǵalı Tasmaǵambetov óziniń eńbek jolyn qazirgi Atyraý qalasy Mahambet aýdanyndaǵy balalar men jasóspirimderge arnalǵan sport mektebinde bapkerlikten bastaǵanyn bireý bilse, bireý bilmes.
Keıin 1981 jyldan 1991 jylǵa deıin KOKP OK-tyń (Keńestik odaqtyń komýnıstik partıasy Ortalyq komıtet) múshesi, 1990-1991 jyldarda Qazaqstan kompartıasynyń OK Polıtbúro múshesi boldy. Qazaqstan Recpýblıkasynyń 12- shaqyrylǵan Joǵarǵy Keńesiniń depýtaty bolyp saılandy.
Al saıası ómirbaıany sol kezdegi jalǵyz jastar saıası uıymy — Qazaqstannyń LKJO-da (Lenındik komýnıstik jastar odaǵy) basshylyq qyzmetimen baılanysty. 1979 jyldan Mahambet aýdanyndaǵy LKJO uıymdastyrý bóliminiń meńgerýshisi, Gýrevte (qazirgi Atyraý) LKJO qalalyq komıtetiniń jáne oblystyq komıtetiniń birinshi hatshysy boldy. 1989 jyly LKJO OK, 1991 jyly Qazaqstan Respýblıkasynyń jastar isi jónindegi Memlekettik komıtetin basqardy.
Qazaq eli táýelsizdik alǵannan keıin araǵa 2 jyl salyp Imanǵalı Tasmaǵambetov QR Prezıdentiniń kómekshisi bolyp taǵaıyndaldy.
1995 jyldan bastap el basqarýshy qyzmetinde joǵarǵy oryndardy atqaryp, Qazaqstannyń vıse-premeri, bilim jáne mádenıet vıse-premer-mınıstri, Qazaqstan Respýblıkasynyń Prezıdenti ákimshiliginiń jetekshisiniń orynbasary, Qazaqstan Prezıdentiniń birinshi kómekshisi, Atyraý oblysynyń ákimi, Qazaqstan premer-mınıstri, Memlekettik hatshy, Qazaqstan Prezıdenti ákimshiliginiń jetekshisi bolady.
2004—2008 jyldary 1,5 mln turǵyny bar Qazaqstannyń eń iri qalasy Almatynyń , 2008 j. sáýirdiń 4 Qazaqstannyń elordasy — Astana qala ákimi bop taǵaıyndaldy. Qazirgi ýaqytta Imanǵalı Tasmaǵambetov QR-nyń RF-daǵy Tótenshe jáne ókiletti elshisi retinde qyzmet atqaryp júr. Bıylǵy jyldyń mamyrynda Reseı eliniń Rjev qalasynda qazaqsha sóılep eldiń súıispenshiligine bólengen edi. Árıne óz elimizde júrip qazaq tilin mensinbeıtin shendilerdiń qasynda Imanǵalı Tasmaǵambetovtyń orny bólek, bedeli asqaq.
Kárim Másimov Qajymqanuly
1965 jyly qazirgi Astana qalasynda dúnıege kelgen. Ulty uıǵyr bolýy bek múmkin, alaıda naqty belgisiz. Ákesi Qajymqan Qasymuly Másimov kezinde kirpish zaýytynyń dırektory bolǵan. Al Qajmuqannyń uly Kárim eńbek jolyn 1991 jyly - Qytaı Halyq Respýblıkasyndaǵy KSRO Saýda ókildiginiń quqyqtyq máseleler boıynsha keńesshisi bolyp bastaǵan. Halyqtyń esinde jyly ornyn uzaq ýaqyt saqtap qala alǵan Úkimet basshysy retinde este qalǵan. 2007 jyly premer-mınıstrlikke Másimov taǵaıyndaldy.
2012-2014 jyldary premer-mınıstr qyzmetin Serik Ahmetov atqarsa, 2014-2016 jyldary Úkimet basyna Kárim Másimov oraldy. Úkimet basshysy bolǵan kezdegi bir jylda bir-aq ret Atyraý oblysynyń jańa ákimin zıaly qaýymǵa tanystyrý úshin is saparǵa shyqqan. Eń alǵash ret Úkimet otyrysyn bastan-aıaq qazaqsha júrgizgen Úkimet basshysy bolyp tarıhta qaldy. Sebebi Qazaqstan úshin bul maqtanarlyq jaıt.
Kárim Másimov qazir 2016 jyly Qazaqstan Respýblıkasy Ulttyq qaýipsizdik komıtetiniń tóraǵasy bolyp taǵaıyndaldy. Ázirge Másimovtiń qyzmetten ketetin túri joq. Elimizdiń qaýipsizdigin qamtamasyz etedi dep úmittenýden basqa amal da joq syqyldy.
Ádilbek Ryskeldiuly Jaqsybekov
1954 jyly Qostanaı oblysy Qarabalyq aýdanyny Bórili aýylynda dúnıege kelgen. 1988-1995 jyldar aralyǵynda kópsalaly «Sesna» korporasıasynyń basshysy retinde qyzmet atqarady.
1995 j. Qazaqstan Respýblıkasy Parlamentiniń Senatyna saılanyp, 1996 jyly Aqmola oblysy ákiminiń orynbasary qyzmetine taǵaıyndalady.
Saıası qaıratker retinde Nursultan Nazarbaevty ıdeal sanaıtyn Ádilbek Jaqsybekov 1997 jyldyń jeltoqsanynan 2003 jyldyń maýsymyna deıin Astana qalasynyń ákimi atanady. Ádilbek Jaqsybekovty «Elbasynyń kóleńkesi», «Elbasynyń oń qoly», - dep ataıtyndar da bar.
2003 j. shildesinen 2004 j. jeltoqsanyna deıin Qazaqstan Respýblıkasy Indýstrıa jáne saýda mınıstri atandy.
2008-2009 jyldary – Qazaqstan Respýblıkasynyń Reseı Federasıasyndaǵy Tótenshe jáne Ókiletti Elshisi, 2009-2014 jyldary – Qazaqstan Respýblıkasynyń Qorǵanys mınıstri bolyp qyzmet atqardy.
2014 jylǵy sáýir men qazan aralyǵynda – Qazaqstan Respýblıkasynyń Memlekettik hatshysy boldy. Keıin qaıtadan 2014-2016 jyldary – Astana qalasynyń ákimi bolyp taǵaıyndaldy.
2016 jylǵy 21 maýsymda Qazaqstan Respýblıkasy Prezıdenti Ákimshiliginiń Basshysy bolyp taǵaıyndalǵan Ádilbek Jaqsybekovty synaýshylar qatary az.
Marat Muhanbetqazyuly Tájın
Sosıologıa ǵylymdarynyń doktory Marat Tájın 1960 jyly Aqtóbe qalasynda týǵan. Almaty halyq sharýashylyǵy ınstıtýtyn jáne S.M.Kırov atyndaǵy Qazaq memlekettik ýnıversıtetiniń aspırantýrasyn bitirgen soń 1992 jylǵa deıin ǵylymı-oqytýshylyq qyzmetpen aınalysady. 1992 jyldan bastap Qazaqstan Respýblıkasy Prezıdenti men Mınıstrler Kabınetiniń Apparatynda: İshki saıasat bólimi meńgerýshisiniń birinshi orynbasary, osy bólimniń meńgerýshisi, QR Prezıdenti Apparaty Basshysynyń orynbasary jáne Aqparattyq-taldaý ortalyǵynyń basshysy retinde jumys isteıdi.
1994-1995 jyldar aralyǵynda Qazaqstan Respýblıkasy Prezıdentiniń Memlekettik keńesshisi, 1995-1999 jyldary Prezıdent Ákimshiligi Basshysynyń orynbasary jáne Prezıdent Ákimshiligi Taldaý jáne strategıalyq zertteý ortalyǵynyń basshysy bolyp taǵaıyndalady.
Keıin 1999-2001 jyldary Prezıdenttiń Ulttyq qaýipsizdik máseleleri jónindegi kómekshisi — Qazaqstan Respýblıkasy Qaýipsizdik Keńesiniń Hatshysy bolyp qyzmet atqarady.
Al 2017 jylǵy qańtardan bastap Qazaqstan Respýblıkasy Prezıdenti Ákimshiligi basshysynyń birinshi orynbasary.
Nurlan Zaırollauly Nyǵmatýlın
Nurlan Nyǵmatýlın 1962 jyly 31 tamyzda Qaraǵandy qalasynda dúnıege kelgen. 1984 – 1985 jyldar aralyǵynda «Qaraǵandyoblgaz» ÓB avtokolonna ınjeneri, basshysy bolyp taǵaıyndalǵan. 1985-1990 jyldary Qazaqstan LKJO Lenın aýdandyq komıtetiniń birinshi hatshysy, Qazaqstan LKJO OK komsomol uıymdary bólimi meńgerýshisiniń orynbasary, Qazaqstan LKJO Qaraǵandy oblystyq komıtetiniń hatshysy, birinshi hatshysy bolyp qyzmet atqardy. 1999-2002 jyldary Astana qalasy ákiminiń orynbasary retinde qyzmet atqarsa, 2002-2004 jyldar aralyǵynda QR Kólik jáne komýnıkasıa vıse – mınıstrine kóterildi. Keıin 2012 jáne 2016 jyly eki ret QR Parlamenti Májilisiniń Tóraǵasy bolyp saılandy.
Saýat Muhametbaıuly Myńbaev
1962 jyly Taldyqorǵan oblysy Panfılov aýdany Úsharal aýylynda dúnıege kelgen. 1989 jyly Almaty halyq sharýashylyq ınıstıtýtynyń oqytýshysy, dosent qyzmetin atqarýshy qyzmetin atqardy. 1995 jyly 10 aı boıy Qazaqstan Respýblıkasy Qarjy mınıstriniń orynbasary bolyp qyzmet etti.
2007-2010 jyldar aralyǵynda Qazaqstan Respýblıkasy energetıka jáne mıneraldy resýrstar mınıstri, 2010-nan 2013 jylǵa deıin QR munaı jáne gaz mınıstri bolyp taǵaıyndaldy.
2013 jyldan bastap "QazMunaıGaz" Ulttyq kompanıasy basqarmasynyń tóraǵasy retinde qyzmet atqaryp keledi. Jýrnalısik zertteýlerdiń halyqaralyq konsorsıýmy byltyr jarıalaǵan ofshor qujattarynda Saýat Myńbaevtyń esimi atalǵan bolatyn. Alaıda «QazMunaıGaz» Ulttyq kompanıasy basqarmasynyń tóraǵasy ofshorda eshqandaı esepshotynyń joq ekenin aıtqan.
