Juma kúni Qyrǵyzstannyń syrtqy ister mınıstrligi Qazaqstan elshisine nota berilgeni týraly habarlady. Bul týraly Qamshy.kz aqparat agenttigi sputniknews.kz saıtynyń deregin negizge ala otyryp. 

Qyrǵyzstannyń syrtqy saıasat vedomstvosynyń resmı habarlamasynda aıtylǵandaı, "Almaty áýejaıynda qazaqstandyq quzyrly organdar tarapynan jasalatyn shekten tys tekserýler týraly Qyrǵyz Respýblıkasy azamattarynan úzdiksiz túsip jatatyn aryz-shaǵymdarǵa baılanysty" Qazaqstan elshisi Kárim Kókirekbaev syrtqy ister mınıstrligine shaqyrylǵan.

"Kezdesý barysynda qyrǵyz taraby Qazaqstannyń quzyrly organdarynyń qadamyna alańdaýshylyq tanytyp, QR quzyrly organdarynyń laýazymdy tulǵalary tarapynan shekten tys, namysqa tıetin áreketter jasalmaýyn basty nazarǵa alýǵa ótinish bildirdi", — dep habarlady Qyrǵyzstannyń SİM.

Qazaqstannyń syrtqy ister mınıstrligi oqıǵaǵa qatysty pikir bildirdi.

"Qazir máseleniń anyq-qanyǵyn jáne qandaı tekserýler týraly sóz bolyp otyrǵanyn anyqtap jatyrmyz", — dep habarlady QR SİM baspasóz qyzmetiniń basshysy Aıbek Smadıarov.

Ol atap ótkendeı, Qazaqstan áýejaılarynda barlyq jolaýshyǵa birdeı qaýipsizdik rejımi saqtalady. Ári ótkizý beketterinde memlekettik shekara týraly zańǵa sáıkes azamattardan jaýap alynady.