Aqtóbe oblysynda bılik jergilikti úsh turǵyndy "mektep tártibine saı kıinbegen balalaryn sabaqqa kúshpen kirgizbek bolyp, muǵalimderge qoqan-loqy jasaǵan" dep aıyptap, jaýapqa tartqan dep jazady Qamshy.kz aqparat agenttigi Azattyqtyń deregin negizge alyp. Bul týraly Aqtóbe oblystyq sotynyń baspasóz qyzmeti xabarlady.

Qyrkúıektiń 14-i kúni Aqtóbe qalasynyń mamandandyrylǵan ákimshilik soty qala turǵyndary Nuráli Shaqkózov, Medet Qudaıbergenov pen Jánibek Ótálıevti ákimshilik qamaýǵa alý týraly qaýly qabyldaǵan. Sot sheshimi boıynsha Shaqkózov úsh táýlikke, Qudaıbergenov pen Ótálıev - bes táýlikke qamalǵan.

Bul azamattardyń balalary Aqtóbedegi №31 mektepte oqıdy. Mektep dırektorynyń orynbasary Sholpan Jıenmýrzınanyń aıtýynsha, osy mekteptiń 13 oqýshysy jańa oqý jyly bastalǵan kúni sabaqqa oramal taǵyp kelgen. Muǵalimderdiń mektep formasyn saqtaý týraly talabynan soń 9-synypta oqıtyn qyz bala ǵana oramalyn sheshýge kelisim bergen.

"Ózge oqýshylardyń ata-analary 3 qyrkúıekten bastap kún saıyn mektepke kelip shý shyǵaryp, muǵalimderge qoqan-loqy kórsetti", - deıdi Sholpan Jıenmýrzına.