Jaqynda Almatyda «Qazposhta» AQ-nyń elimizdegi eń úlken sálemdemeler sýpermarketi ashylyp, qala turǵyndaryna demalyssyz qyzmet kórsetýde.
Áýezov aýdanynda ornalasqan bul fılıaldyń kólemi 1180 sharshy metrdi quraıdy. Atalmysh bólimshe 200 myńnan asa adamǵa qyzmet etýge arnalǵan. Ondaǵy qyzmet túrleri de kópqyrly.
«Osy bólimshe 230 myńnan astam turǵynǵa qyzmet usynady. Aı saıyn bul sýpermarket 30 myńnan asa adamǵa ózderiniń joldamalaryn jiberedi. Sálemdemeler sýpermarketi arqyly nesıe alýǵa, komýnaldyq tólemderdi tóleýge, ótemaqysyn óteýge, zeınetaqysyn alýǵa bolady», – deıdi «Qazposhta» AQ Almaty qalalyq fılıaly «Almaty pochtamt» dırektorynyń orynbasary Nurdáýlet Qabylov.
Mundaı sýpermarketterdiń ashylýy – poshta jónelmtimderin jedeldetýge jańa serpin berip, kompanıanyń óndiristik shyǵyndaryn ońtaılandyrýǵa jaǵdaı jasap jatyr.
«Orta aılyq kórsetkish boıynsha 32 myń poshtalyq jóneltim jiberýge qaýqarly. Al kún saıynǵy kelýshilerdiń sany shamamen 900-1100 adamdy quraıdy», – dedi «Qazposhta» AQ bıznes jónindegi basqarýshy dırektory, basqarma múshesi Azat Mashabaev.
Onyń aıtýynsha, qazirgi tańda Qazaqstanda 186 sálemdemeler sýpermarketi jumys isteıdi. Jóneltim prosesindegi mundaı format búginde qoldanýshylardyń yqylasyna bólenip úlgergen. Aǵymdaǵy jyldyń sońyna deıin taǵy da 4 úlken sálemdemeler sýpermarketin ashý josparlanyp otyr.
Kez kelgen tutynýshy óz taýarynyń kelgen-kelmegenin telefonyna jiberilgen habarlama arqyly bile alady. Ol úshin operatorǵa nebári jeke kýáligi, taýardy jáne telefon nómirin usynsa jetkilikti. Sondaı-aq, ol taýaryn ózine qolaıly ýaqytta alyp ketýine bolady.
Aıta keteıik, elimizidegi eń alǵashqy sálemdeler sýpermarketi 2015 jyly Astana qalasynda ashylǵan bolatyn. Mundaı júıeniń arqasynda sýpermarket klıenti Qazaqstannyń kez kelgen aımaǵyna taýaryn ózi jibere alady. Qyzmetti paıdalaný úshin klıent trek nómiri bar sálemdemeni salýǵa arnalǵan qorapshany satyp alýy kerek. Júıe sálemdemelerdi qabyldaý men jiberý merzimin azaıtýǵa, kásiporynnyń shyǵyn kólemin únemdeýge járdemdesýde. Sonymen qatar, kezek kútýdegi kóptegen keleńsizdikterdi joıyp, turǵyndarǵa jaılylyq syılamaq. Osyndaı sálemdemeler sýpermarketi poshta jelisin sıfrlandyrý maqsatynda jasalyp jatqan isterdiń biri. Buǵan qosa, sıfrlandyrý aıasynda Post.kz portaly da belsendi qyzmet etip jatyr. Bul qarjy jáne poshta qyzmetteriniń onlaın portaly. Oǵan ınternet arqyly kompúterden nemese mobıldi qosymsha arqyly kirýge bolady. Ol jerde hattar, sálemdemeler jiberý, tólemder jáne aýdarymdar, basqa da servıster kórsetiledi.
