Golovkın men Alvarestiń jekpe-jeginen keıin halyq túrli pikir bildirip jatty. Biri "Genany chempıon", dese endi biri "bul boks emes bıznes boldy", dep pikir qaldyrdy. Jaqynda "Kanelo 2-márte dopıngpen ustaldy. Resmı kórsetilim Qazsport arnasynda 20 qyrkúıek, saǵat 20:00-de ótedi" , — degen jalǵan aqpar tarady.    

Beıresmı derekke qatysty "Qazaqstan" telekorporasıasynyń basshysy Erlan Qarın óziniń feısbýk paraqshasy arqyly jaýap berdi. 

"Genanyń jeńilisine ókingeni de bar, tipti qaıǵyrǵany da bar. Biraq, eldiń kóńilimen bylaı oınap, ázildeý endi tipti artyq. Kesheli beri kóptegen azamattar myna jalǵan aqparatqa senip, jekege jazyp surap jatyr. Eshqandaı da qaıta jekpe-jek jýyrda bolmaıdy.  Kez kelgen jekpe-jek birneshe aı buryn daıyndalady, ondaı bolatyn bolsa, mindetti túrde arnaıy xabarlaımyz", dep jazdy Erlan Qarın. 

Eske salsaq, 16 qyrkúıekte Golovkın-Alvares jekpe-jegi ótip, Golovkın "Kaneloǵa" ese jibergen edi. Alaıda qos boksshy 5 mamyrda úshinshi ret rıngte kezdesýi múmkin. Bul týraly Golovkınniń bapkeri Sanches málimdedi.