Almaty qalasy Jastar saıasaty basqarmasynyń «Dúısenbilik sport» jobasy aıasynda NEET sanatyndaǵy jastar arasynda kıbersporttan ótken týrnır máresine jetti.
Social project management ortalyǵynyń uıymdastyrýymen ótken jarysqa «Baısat», «Kenjehan», «Altyn orda», «Salem» «Ójet», «Arystan» jáne taǵy basqa bazarlardan 30 oıynshy qatysty. Real kompúterlik klýbynda ótken týrnırge kıbersport mamandary tórelik jasady.
Kıbersporttyń túri kóp ekeni belgili. Uıymdastyrýshylar men qatysýshylardyń uıǵarymymen týrnır oıyny retinde kıbersporttyń FIFA 25 nusqasy tańdaldy.
Oıynshylar ózderine unaıtyn komandalardy ıemdenip, sol arqyly kompúter ekranynda oıyn órnegin kórsetti. Qatysýshylar fýtbol komandalary retinde «Rael Madrıd», «PSJ», «Bavarıa», «Galatasaraı», «Inter Maıamı», «Chelsı» sıaqty úzdik klýbtardy tańdap, ózderi «tizgindegen» osy klýbtar arqyly bir birimen jarysty.
Jarystyń tartys bolǵany sonshalyq – tutqany qos qoldaryna myǵym ustaǵan oıynshylar aldaryndaǵy ekrannan kóz almady. Gol soqqan sátte qýanyp sergip qalǵan qatysýshylar da, «qap áttegen-aı» dep san soǵyp qalǵandar da boldy. Eń bastysy jeńilgender jeńgenderdi moıyndap, jeńgender jeńilgenderdi arqadan qaǵyp jubatyp jatty.
Jarysqa qatysýshylardyń biri Nurlan İlıas týrnır kezinde bylaı dep óz oıyn bildirdi. «Bir jyldary kıbersportty qumar oıyndar qataryna jatqyzatynmyn. Bul oıym qate ekenin keıin bildim. Kıbersporttyń olımpıadalyq oıyndar tiziminde ekenin estigenimde alǵashynda senbedim. Anyq kózim jetken soń osy sporttyń izine túsip, oıyn daǵdymdy jetildirip kelemin. Kıbersport adamdy shapshańdyqqa, ańǵarympazdyqqa, alǵyrlyqqa baýlıdy eken. Muqıat bolmasań aıaq astynan múlt ketesiń» deıdi ol.
Jarys qorytyndysy boıynsha 1-oryndy “Altyn orda” bazarynan kelgen Saparbek Jánibek ıelenip, 250 myń teńgeniń sertıfıkatyn qanjyǵasyna baılady. 2-oryn “Kar sıtı” bazarynyń taǵy bir oıynshysy Aıat Iketaıǵa buıyryp, 150 myń teńgeniń sertıfıkatyn enshiledi.
“Salamat” bazarynyń oıynshysy Álibek Turysbek pen “Baısat” bazarynyń namysyn qorǵaǵan Myrzabek Qoshtyqov 3-oryndy ózara bólisip, árqaısysy 50 myń teńgeden oljalady. Jeńimpazdarǵa sertıfıkattar men medal, kýboktardy týrnırdiń qurmetti qonaǵy – bokstan Qazaqstan Respýblıkasynyń sport sheberiAlıas Altaı tabys etti.
Búgingi kıbersport jarysy «Dúısenbilik sport» jobasy aıasynda ótken alǵashqy týrnır. Aldaǵy ýaqytta bazar jastary arasynda voleıboldan, shaǵyn fýtboldan, ústel tenısinen, sýǵa júzýden týrnırler ótkizý josparlanyp otyr.
