Keshe ǵana Muhtar Jákishev óziniń naýqas anasymen kezdesýge ruqsat suraǵan edi. Alaıda bılik bul ótinishti oryndaýdan bas tartty.
"Jákishevtiń syrtqa shyǵýyna Qylmystyq-atqarý kodeksiniń "Mekemeniń sheginen tys jerge shyǵý" týraly 113-babynyń 5-tarmaǵyna sáıkes ruqsat berilmegen. Bul tarmaqta "terorıstik, ekstremıstik qylmystar úshin ne qylmystyq top quramynda jasalǵan qylmystar úshin, sondaı-aq jas balalarǵa jynystyq tısý qylmystarmen sottalǵandarǵa syrtqa shyǵýǵa ruqsat etilmeıdi", — delingen otandyq BAQ-ta jarıalanǵan habarlamada.
Búgin tańerteń 80 jastaǵy Muhtar Jákishevtiń anasy Raısa Jákisheva qaıtys boldy degen qaraly habardy estidik. Átteń dedik ishteı... Muhtar Jákishev anasynan aıyrylatynyn sezgendeı bir-eki kún buryn bılikten anasymen kezdestirýin ótingen edi. Bılik adamgershilikke salyp kelisim bergende anasy sońǵy ret ulyn kórip úlgeretin be edi, kim bilsin? Jyldar boıy ulyn kútken, bılikten "bosatady", - dep úmit kútken anasy armanda ketti. Muhtar Jákishevtiń anasyn sońǵy ret kórýge múmkindigi bolǵan.
Tanymal zańger Abzal Quspannyń aıtýy boıynsha, qylmystyq atqarý kodeksindegi talaptarǵa sáıkes et-jaqyn týystary ólim aýzynda jatqan kezde ne qaıtys bolǵan jaǵdaıda sońǵy saparǵa shyǵaryp salý rásimine aparý quqyǵy berilgen. Alaıda bılik bul talapty oryndaýǵa mindetti emes eken.
"Bul jaǵdaıda jazasyn óteý organdary sheshim qabyldaıdy. Olar zań talaptaryn buzdy dep te aıta almaımyz. Sebebi zańmen adamǵa quqyq ta, mindet te beriledi. Jazasyn óteý organdary bul talapty óteýge mindetti emes, biraq quqyly edi. Biraq kópten beri japa shegip jatqan azamattyń anasymen kezdesýine ruqsat bergeni durys. Bıliktiń osy jaǵdaıda ózin jaqsy qyrynan kórsetýine múmkindigi boldy. Biraq olar sol múmkindikti paıdalana almady. Qazir osy jańalyqty oqyǵan halyqtyń bılikke narazylyǵy kúsheıe túsedi. Jazasyn óteý organdary basshylyqqa óz oılaryn durys jetkize almaǵandyqtan Muhtar Jákishev anasymen kezdese almady. Endi eń bolmaǵanda Jákishevke anasyn sońǵy saparǵa shyǵaryp salýǵa aparýǵa keńes beremin. Qazir bizdiń júıede tulǵa qalǵan joq. Sot bolsyn, prokoratýra bolsyn. Barlyǵy oryndaýshylar", dep pikir bildirdi Abzal Quspan.
Bılik zań talabyn buzbaǵanymen, adamgershiliktiń shartyn óreskel buzdy. Muhtar Jákishevtiń anasynan basqa eshkimi joq edi. Ákesi 2001 jyly ınsýltten kóz jumǵan, endi anasy da o dúnıelik boldy. Naǵyz qylmyskerlerdi shartty túrde bostandyqqa shyǵaratyn zańnyń ómiriniń 9 jylyn túrmede ótkizip, ómir men ólim úshin kúresip jatqan Muhtar Jákishevke azattyq bermeı turǵany janǵa batady. Budan keıin bılikten ne úmit, ne qaıyr... Endigi bıliktiń uıaty oıansa, Muhtar Jákishevti anasyn sońǵy saparǵa shyǵaryp salý rásimine qatystyrady degen úmittenemiz.
Qamshy.kz aqparat agenttigi Muhtar Jákishev pen týǵan-týysyna orny tolmas qazaǵa baılanysty qaıǵyra kóńil aıtady.
