Túrkistan oblysynda «Qazaqstannyń bolashaǵy – qazaq tilinde» atty semınar trenıń ótedi. Osyǵan oraı, óńirlik komýnıkasıalar qyzmetinde baspasóz jıyny ótti. Oǵan Qazaqstan Halqy Assambleıasy ǵylymı-saraptama keńesiniń múshesi, saıasatker Dos Kóshim men BAQ ókilderi qatysty, dep habarlaıdy Qamshy.kz aqparat agenttigi. 

Baspasóz máslıhatynda memlekettik tildiń mártebesi sóz boldy. Qazaqstan Halqy Assambleıasy ǵylymı-saraptama keńesiniń múshesi, saıasatker Dos Kóshimniń oıynsha, qazaq tiliniń mártebesin kóterý úshin halyqtyń belsendiligi joǵary bolýy kerek.

«Keńes úkimetiniń shekpeninen bosap shyqqan elderdiń arasynda memlekettik tildiń mártebesin kóterý jaǵynan kemshin tustarymyzdyń bary jasyryn emes. Bul olqylyqtyń ornyn toltyrý úshin qoǵam bolyp atsalysý kerek. Iaǵnı, memleket tarapynan qazaq tiline jasalyp otyrǵan jaǵdaıdy durys paıdalanýymyz kerek. Sońǵy kezderi qoǵamda jıi aıtylyp júrgen máseleniń biri memlekettik tildi kóterý. Áleýmettik jelilerde, jıyndarda túrli usynystar men pikirler aıtylyp jatady. Biraq, is júzine kelgende eshkim bas aýyrtqysy kelmeıdi. Meniń aıtqym kelgeni qoǵamda memlekettik tilge degen suranysty arttyrý kerek. Azamattar tarapynan qajettilik bolmasa, bul másele sol kúıi qala bermek», – dedi Dos Kóshim.

Sonymen qatar, baspasóz otyrysynda kırıll qarpin latyn qarpine kóshirý jaıy da talqylandy. 2018 jyldyń sońyna qaraı latyn qarpine negildelgen jańa álipbı qabyldanatynyn aıtqan spıkerler osy máselege de beıjaı qaramaý kerek ekenin aıtady. Latyn qarpin talqylaýǵa qatysatyn ǵalymdarmen ótken dóńgelek ústelderde óz usynysyn  talqylaýǵa salyp, belsendilik tanytýdyń mańyzy zor ekeni aıtyldy.

Baspasóz jıyny sońynda 15-17 qazanda Qazaqstannyń ońtústik óńirde, ıaǵnı Túrkistan, Kentaý, Arys, Shymkent qalalarynda «Qazaqstannyń bolashaǵy – qazaq tilinde» atty respýblıkalyq semınardyń ótetindigi habarlandy.