«Nur Otan» partıasy tóraǵasynyń birinshi orynbasary Máýlen Áshimbaev partıa men Eńbek jáne halyqty áleýmettik qorǵaý mınıstrliginiń uıymdastyrýymen ótken «Qazaqstannyń úzdik áleýmettik jobalary» baıqaýynyń jeńimpazy jaıly vıdeo rolık kórsetti.

Ondaǵan rolıktiń ishinen komısıa Almaty qalasynyń turǵyny Rasıma Temirbaevanyń jobasyna erekshe nazar aýdardy.

Rasıma Qadyrqyzy birneshe jyldan beri zeınetkerlerge arnap tegin túski as daıyndaıdy. Joba avtorynyń aıtýynsha, maqsaty – adamdardy tegin tamaqtandyrý ǵana emes. Zeınet jastaǵy qarıalardyń kóbisi jalǵyz. Al tegin asqa jınalǵandar bir-birimen aralasyp, tanysyp-bilisip qalsa – Rasıma hanymnyń maqsatynyń oryndalǵany.

Rasıma Qadyrqyzy alǵashynda jobasyn nebári 20 túski astan bastaǵan. Al búgin áıel áleýmettik jaǵdaıy tómen 130 adamdy tamaqtandyryp otyr.

«Rasıma Temribaeva – álem úshin jaqsylyq jasaǵysy kelip júrgen adamdar úshin úlgi. Jalpy elimizde kómekke muqtaj jandarǵa qol ushyn sozýǵa daıar adam kóp. Bizdiń partıa mundaı jobalardy qoldaýǵa qashan da daıyn», - dedi Máýlen Áshimbaev.

Aıta keteıik, Almaty qalasynyń ákimdigi men “Nur Otan” partıasynyń aýmaqtyq fılıaly “Qazaqstannyń úzdik áleýmettik jobalary” baıqaýyn uıymdastyrýǵa bıyl da atsalysty. Maqsat – “Prezıdenttiń bes áleýmettik bastamasy” atty úndeýde aıtylǵan mindetterdi iske asyrý, múmkindigi shekteýli jastar quqyǵyn qorǵaý jáne olardyń ómir súrý deńgeıin jaqsartý.

Baıqaý 20 sáýirde jarıalanyp, 30 maýsymda ótinish qabyldaý aıaqtaldy.

Aldymen baıqaýdyń aýmaqtyq irikteý syny ótti, odan iriktelgender óńirlik baıqaýǵa qatysady. Óńirlik kezeńniń jeńimpazdary 31 shildege deıin anyqtalady. Budan soń úzdikterdiń úzdigi respýblıkalyq synda belgili bolady.

Aıta keteıik, 1-oryndy «Zeınetkerlerge tegin túski as» jobasymen qatysqan Rásıma Temirbaeva aldy. «Bul – barlyq qaıyrymdy jannyń jemisi»,  - dedi jeńimpaz óz sózinde. Al ekinshi oryndy «Arbadaǵy kedergisiz ómir» jobasymen qatysqan Nurbolat Qarabasov jáne «El nazy» art-terapıamen damytý ortalyǵy jobasymen qatysqan belgili ánshi Kenjebek Janábilov aldy. Ánshiniń ulynyń estý qabileti tómen bolǵandyqtan em izdep álem sharlaǵan. Tıisti operasıa sátti ótkendikten balasy búgin de jaza da, oqı da alady. Mundaıdy basynan ótkergen Kenjebek Janábilovtiń ózi de basqa ata-analarǵa kómektesýdi maqsat etedi. Sóıtip «El nazy» atty jobasyn jasap shyǵarady.

3-oryndy «Meıkaton «TOM: Kazakhstan» jobalarymen Marjan Mádıeva jáne Sánıa Arapova ıemdendi. Mańǵystaýlyq arýlar «Úmit sáýlesi» atty avtorlyq telebaǵdarlamalar arqyly sońǵy 11 jylda talaı janǵa kómek qolyn sozyp keledi. Ásirese, jalǵyz qalǵan qarıalar men ata-ananyń qamqorlyǵynsyz qalǵan balalarǵa osy baǵdarlamanyń arqasynda tyǵyryqtan shyǵar jol tabýǵa kómektesken.

Budan bólek daýys berý nátıjesi boıynsha arnaıy syılyqtar tabystaldy.

«Qazirgi tańda izgilik pen meıirimniń dánegin seýip júrgen osyndaı jobalardy keńinen dáripteýdiń bereri mol. Sondyqtan partıamyz aldaǵy ýaqytta da bul baǵyttaǵy jumystaryn odan ári jalǵastyratyn bolady. Sebebi, qurmet, izgilik, qamqorlyq sıaqty adamı qasıetterge negizdelgen mundaı jobalardyń mańyzy qashanda joǵary. Óıtkeni, álemdi meıirim qutqarady. Sondyqtan árqaısymyz qasymyzda júrgen janǵa meıirim syılap, osy bir asyl qasıettiń aıasyn keńeıtýge atsalysaıyq», - degen edi Máýlen Áshimbaev.