Dımash álemdik deńgeıdiń, ónerge degen bıik talǵamnyń ne ekenin qazaqtarǵa ábden uqtyrǵandaı boldy. Árıne, uǵatyndaı sanasy barlarǵa jerine jetkize túsindirdi. Óıtpegende, ony qazirgideı maqtan tutý bylaı tursyn, endigi sahnadan qýyp jiberer me edik, kim bilsin. Birneshe jyl buryn álde bir «ádil qazylar alqasy» deıtin bireýler sol Dımashtyń ıt terisin basyna qaptap synap-minep jatqanyn dúıim jurt kórip, estigen edi ǵoı. Al, búgin álem elderiniń joǵary talǵamdy, bıik mádenıetti kórermenderi men shyn kásibı ónertanýshylary ony tanyǵan soń ǵana qazaqtar «ıá, solaı eken ǵoı» dep moıyndaǵan bolyp jatyr. Buryn solaı tanysa, moıyndasa qaıda qaldy? 

Moıyndaýǵa da, tanýǵa da bizdiń danyshpandardyń óresi jetpes edi. Álgi «ádil qazylar alqasy» atalatyn topas tobyrdyń biregeı ókilderi synaǵan soń bitti. «Ol – ánshi emes, shyńǵyrǵan jaı bireý» dep qana qarap, shyn talantty tentiretip jibergen bolar edik. Baıaǵy sol Abaı dana aıtqandaı «kóp aıtsa boldy, jurt aıtsa kóndi» degenniń keri. Bul jerde «kóp» degendi «topas», «jurt» degendi «tobyr» dep túsingen abzal shyǵar. Qazir de kóptegen salada sol topastardyń («ádil qazy») degeni júrip, tobyr solardyń yǵyna qaraı jyǵylyp tur. Jalǵyz án ónerinde ǵana emes, barlyq salada solaı. 

Túrli baıqaý-júldelerde, konkýrs-ponkýrstarda at tóbelindeı bir top qazylyq etip otyrady. Olardyń deni sol ádildikten sadaǵa ketkir zalymdar. Talǵam deńgeıleri álemdik standarttardan áldeqaıda artta qalǵan, biliktilikteri tym tómende jatsa da, sonysyna qaramaı ataqtary tar sheńberdiń aýmaǵynda ǵana jer jarady. Qysqasy, qazaqstandyq masshtabta sol topastardan asqan danagóı joqtaı-aq kóredi. Jurt solardyń aıtqanyna kónedi de, qaıdaǵy bir darynsyz, haltýrshıkterdi kókke kóteredi. Shyn máninde, olardyń ádil qazy da, salanyń bilgirleri emes ekendigin án ónerinde bir Dımash qazir tolyqtaı pash etti, birshama eldiń kózin ashty. 

Endi, ádebıet, kıno sekildi ózge de kóptegen salada Dımashtaı shyn daryndar álemdik deńgeıde tanymal bola bastasa, qazirgi madaqtalyp, orden taǵyp, ataq alyp júrgender men olarǵa baǵa berip, saraptama jasap otyrǵan danyshpandardyń da arttary ashylyp, aı dalaǵa tentirep keter edi.

Qýandyq Shamahaıulynyń Facebook paraqshasyndaǵy jazba