Jańa jyldyń qarsańynda Almatyda oryn alǵan iri kólik apatyna qatysty tyń derekter paıda boldy. Quqyq qorǵaý organdarynan boı tasalaǵan kúdikti 7 jyldan 12 jylǵa deıin jaza arqalaıtyn bolady. Bul týraly búgin qalalyq polısıa departamentiniń baspasóz qyzmeti málimdedi. Al osy apat kezinde tiri qalǵan aktrısa Aızada Satybaldıeva áli jansaqtaý bóliminde jatyr. Dárigerler onyń jaǵdaıyn aýyr dep baǵalaıdy. Sondaı-aq, marqum Sholpan Elgezekovamen birge kóz jumǵan kólik júrgizýshisi men aktrısanyń qurbysy týraly da derekter málim boldy, dep habarlaıdy Qamshy.kz aqparat agenttigi Astana arnasynyń málimetine súıene otyryp.
Qaıǵyly oqıǵaǵa qatysty túrli málimetter jańa jyldyq demalys kúnderi áleýmettik jelini qatty dúrliktirdi. Senbi kúni tańǵa jýyq bolǵan kólik apatynan alǵashqyda eki adam qaıtys bolǵan degen málimet taraǵan. Onyń biri kıno jáne teatr aktrısasy Sholpan Elgezekova ekeni belgili boldy. Al «Mersedes Gelendvagen» kóliginiń júrgizýshisi oqıǵa ornynan ketip qalýy qoǵamdyq rezonansty kúsheıtip jiberdi.
Mynaý bárin qıratyp tastady...
Kóp uzamaı oqıǵa bolǵan jerden beınetúsirilimder tarady. Polısıa departamentiniń ortalyq basqarý júıesinde tirkelgen myna beınejazbada jol talǵamaıtyn kólik baǵdarshamnyń qyzyl túsine ótkeni anyq kórinedi. Aldyn ala boljam boıynsha, erejeni «Gelendvagen» júrgizýshisi buzǵan. «Ol kóp uzamaı ustaldy jáne onyń rólge mas kúıinde otyrǵany belgili boldy»-dedi polısıa departamentiniń resmı ókili. 1985 jyly týǵan kúdiktige Qylmystyq kodekstiń eki birdeı babymen aıyp taǵylyp otyr. Ol 12 jylǵa deıin bas bostandyǵynan aıyrylýy múmkin.
"Tergep jatqan anyqtaý basqarmasynyń qyzmetkerleri sot prokýror aldynda bul azamatty qamaý týraly usynys jasady. Muny sotta, prokýror da qoldady. Tergeý kezinde bul azamat mindetti túrde qamaýda bolady, qazir tergeý ızolátoryna qamaldy. Tıisti saraptamalar taǵaıyndaldy, is materıaldary sotqa joldanatyn bolady" - dep málimdedi Almaty qalalyq polısıa departamentiniń resmı ókili Saltanat Ázirbek.
Jeńil avtokóliktiń tizgininde bolǵan Baqytnur Qunypıa esimdi myna jigit. Ol oqıǵa ornynda birden kóz jumǵan. Almaty oblysy Qaskeleń qalasynda kolejde jumys istegen. Áriptesi ári dosy Dolqyn Nursalı 2002 jyly Qytaıdan kóship kelgenin aıtty. Sodan beri juby jazylmaı sońǵy kúnge deıin birge júrgen. Baqytnurdyń anasy men úsh baýyry Qytaıda turady dedi. Al, ózi bilim izdep, tarıhı otanyna qonys aýdarǵan.
"Sońǵy ret men ony 28-i kúni tańerteń kórdim, ol uıyqtap jatqanda men jumysqa ketkenmin. Sodan men aýyryp bolnısaǵa jatyp qaldym, ertesi saǵat 10-darda maǵan Baqytnur avarıadan qaıtys boldy degen habar keldi. Mashınasyn kredıtke alǵan bolatyn. Ózi bir kúızeliste júrdi, jalqysy jetpeıtin. Sosyn taksı bolamyn dep shyǵyp ketetin qalaǵa. Oılamaǵan jerden osyndaıǵa dýshar bolyp otyr" - dedi dosy Dolqyn Nursalı.
«Mısýbısı» kóligindegi jolaýshylardyń arasynda aman qalǵan jalǵyz jolaýshy Aızada Satybaldınovanyń jaǵdaıyn dárigerler áli de aýyr dep baǵalap otyr. Ol Muhtar Áýezov atyndaǵy drama teatrynyń aktrısasy, qazir ol jansaqtaý bólimine jatyr.
"Qazirgi kezde jaǵdaıy aýyr. Bir qalypty. Dıagnozy: qosarlanǵan aýyr jaraqat, jabyq bas mı jaraqaty, bas mıynyń soǵylýy. Kóptegen qabyrǵalary synǵan, travmatıkalyq shokta áli", - dep atap ótti Almaty qalalyq shuǵyl kómek kórsetý aýrýhanasynyń bas dárigeriniń orynbasary Ońlasyn Ibekenov.
Sholpan Elgezekova Astana arnasynda qarasha aıynda tusaýy kesilgen «Júrek syry» telehıkaıasynda basty rólderdiń birin somdaǵan bolatyn. Al, jol apatynyń úshinshi qurbany-Astana qalasynyń turǵyny. Eki balanyń anasy Dınara Hamıtova taǵam tasymaldaıtyn kompanıalardyń birinde atqarýshy dırektor bolyp qyzmet etken. Sheteldik qymbat kólik júrgizýshisiniń týystary marqumdardyń jaqyndarynan keshirim suraǵan. Muny qaıtys bolǵan jandardyń týystary aıtty.
"Qalalyq polısıa departamenti basty kúdiktiniń atyn ataýdan bas tartyp otyr. Prokýratýra jergilikti polısıaǵa onyń fotosýretin kórsetip, esimin tolyq ataýǵa tyıym salǵan. Biraq, sońǵy kúnderi áleýmettik jeliler men keıbir aqparattyq agenttikter kúdiktiniń esimi Ilás ekeni aıtylyp jatyr", - deıdi tilshi Rıshat Asqarbekuly.
