Taldyqorǵanda Alakól kóli jaǵalaýyndaǵy «Qoqtem Grand Resorts» bes juldyzdy qonaqúıi tanystyrylymyna arnalǵan baspasóz konferensıasy ótti. İs-sharaǵa Almaty oblysy Týrızm basqarmasynyń jetekshisi Janar Alshymbaeva, Almaty oblysy Kásipkerler palatasy Adamı kapıtaldy damytý bóliminiń basshysy Almagúl Ońǵarbaeva,  «Qoqtem Grand Resorts» qonaqúı kesheniniń basqarýshy dırektory Almajan Baqturazova, sonymen qatar týroperatorlar men BAQ ókilderi qatysty. 

 Qonaqúı jeke qarjyǵa salynǵan. Qonaqúıdiń ashylýy osy jazǵa josparlanǵan, alaıda keshen aldyn ala brondaýdy iske qosty. Kópfýnksıaly qonaqúı kesheni 450 orynǵa shaqtalǵan. Keshende 102 nómir bar, onyń ishinde 97-si – standartty, 4-i – lúks, 1 –prezıdenttik lúks nómiri. Keshen qoldanysqa berilgen soń 80 turaqty jumys orny ashylady. Keshenniń jalpy aýmaǵy 16 gektar.

«Qonaqúı kesheni bes qabattan turady. Jazǵy terasasy bar kafe, balalar alańqaıy, sport alańdary ashylady. Jaıly nómirler men jaqsy servıs qonaqtardyń kóńilderinen shyǵady degen oıdamyn», – dep atap ótti qonaqúı kesheniniń basqarýshy dırektory Almajan Baqturazova.

Almaty oblysy Týrızm basqarmasynyń jetekshisi Janar Alshymbaeva Alakól kóli jaǵalaýyndaǵy ınfraqurylymdy jaqsartý boıynsha qoldanyp jatqan sharalar týraly aqparat berdi. Onyń aıtýynsha, bıyl kól janyndaǵy Aqshı aýylynda shaǵyn bazar ashylyp, al qonaqúılerinde kádesyılar satylatyn bolady.

«Bólshek saýda núktelerin qurý maqsatynda qazirgi ýaqytta Alakól aýdanynyń basshylyǵy ýaqytsha nysandardyń qurylysy bastalatyn jer telimin qarastyryp qoıdy. Bul saýda oryndar kásipkerlerge usynylady. Sonymen qatar, qonaqtardy ornalastyratyn jerlerde kádesyılar satylatyn bolady. Osyǵan deıin kádesyılardy kásibı óndiretin bir kompanıamen kelisimge keldik», – dedi Janar Alshymbaeva.

Týrızm salasynda mamandardy daıyndaý, servıs sapasy máselesin Almaty oblysy Kásipkerler palatasy Adamı kapıtaldy damytý bóliminiń basshysy Almagúl Ońǵarbaeva kóterdi. Spıker «Eńbek» Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlama sheńberinde  kompanıa jumys mamandaryn daıyndaýmen aınalysa alatynyn aıtty.

«Búginde oblys aýmaǵynda 26 kompanıa mamandardy daıyndaý boıynsha oqý ortalyqtaryn qurdy, sonyń ishinde 20 oqý orny kásiporyn janynan qurylǵan. Alaıda, olardyń ishinde týrızm boıynsha oqý ortalyǵy joq. Al týrısik sala úshin kadr jáne servıs máselesi ózekti», – dedi Almagúl Ońǵarbaeva.

 Ary qaraı «Jetisý» avıakompanıasynyń avıa tasymaldar qyzmetiniń aǵa dıspecheri Gúlmıra Qasenova qonaqtarǵa Alakól kóline ushý baǵdarlamasy týraly aqparat berdi. Onyń aıtýynsha, 2017-2018 jyldar aralyǵynda kólge barǵan jolaýshylardyń sany artqan. 2017 jyl ishinde Úsharal áýejaıyna 1880 jolaýshy ushqan, al beri  2148 jolaýshy kelgen. Al 2018 jyly kólge ushýǵa 4419 jolaýshy, kólden kelý 3641 jolaýshyny quraǵan.

 «Bıyl Astana-Úsharal, Úsharal-Almaty baǵyty boıynsha ushaqtar alty aı boıy aptasyna 4 ret ushatyn bolady. Bılet quny – 16 000 teńge. Almaty-Úsharal-Almaty baǵyty boıynsha reıs alty aı boıy aptasyna 6 ret bolady. Quny – 10 000 teńge. Reısterdi  Scat avıakompanıasy júzege asyrady», – dedi Gúlmıra Qasenova.

Bıyl Taldyqorǵan-Úsharal-Taldyqorǵan (bılettiń josparlanǵan  quny – 12 000 teńge), Almaty-Úsharal-Almaty (bılettiń josparlanǵan  quny – 18 000 teńge) baǵyty boıynsha reısterdi «Jetisý» avıakompanıasy aptasyna úsh ret júzege asyrady.

İs-shara barysynda  «Complete Service» kompanıasynyń ishki týrızm departamentiniń jetekshisi Raýshan Sartaeva sýbsıdıalaý, sanıtarıalyq aımaqtardy jaqsartý, qonaqúıler quzyrettiligin arttyrý jáne aqparattyq týrlardy ótkizý máseleleri týraly áńgimelep berdi.

Usynǵan: Gúlim Jaqan