Qamqorshylyq organy tórt jyl boıy basqa otbasynda tárbıelenip kelgen bes jasar Ásemgúl Orazymettiń ata-anasyn tapty dep habarlaıdy Qamshy.kz aqparat agenttigi  Aqtóbe oblysynyń Óńirlik komýnıkasıalar qyzmetine silteme jasap.

Bilim basqarmasynyń málimetinshe, 2015 jyldyń tamyz aıynda anasy qyzyn kútýshisi Foteksa Marıanaǵa qaldyrady. Osy ýaqytqa deıin qyz bala  onyń otbasynda tárbıelenedi. Marıana turmysta, 3 ul tárbıelep otyr, olardyń ekeýi eresek.

«Qyzdyń anasy Astanada turyp jatqandyǵy anyqtaldy. Almaty aýdanynyń qalalyq bilim bóliminiń qorǵanshylyq jáne qamqorshylyq organy Astana qalasy bilim bólimine suranys joldady. Telefon arqyly sóılesý barysynda áıel tórt jyl buryn otbasy jaǵdaıyna baılanysty qyzyn kútýshige qaldyrýǵa májbúr bolǵanyn aıtqan. Qyzdyń ákesi de Astanada turady. Pirmanova Ásel osy aptanyń ishinde balany otbasyna alyp ketetinin jetkizdi» - dep túsinikteme bergen  bilim basqarmasy Orazymet Ásemgúldi otbasyna qaıtarý máselesi zańnamamen belgilengen tártipte qatań sheshiletindigin atap ótti.

Zańdy ókilderiniń bolmaýy sebebinen qyz bala "Aıala" ómirlik qıyn jaǵdaıǵa tap bolǵan balalardy qoldaý ortalyǵyna ýaqytsha ornalastyryldy. Qyzben psıhologtar jumys isteýde.

Usynǵan: Maqpal Sembaı