"The World’s Best" atty amerıkalyq shoýdaǵy Qazaqstannyń atynan taǵaıyndalǵan sarapshy maman jáne ádil qazy alqasynyń múshesi Gaýhar Nurtas saıys týraly pikirimen bólisti dep jazady Qamshy.kz aqparat agenttigi. 

— Dımash pen Danelıadan basqa qatysýshylardyń óneri sizdi tańǵaldyra aldy ma?

Iá. Men Koreıadan kelgen qatysýshylardyń ónerine tánti boldym.  Olar kásibı túrde erekshe óner kórsetti. Maǵan qatty unady. Sondaı-aq óz erekshelikterimen basqa da qazylar alqasynyń júregin jaýlap aldy. 

— Bul "Mınýta slavy" saıysynyń kóshirmesi me?

Jobaǵa birneshe eldiń talanttylary qatysty. Bul joba burynǵydan ózgerek. Jobany men basqalarmen salystyra almaımyn. Sebebi mundaı saıys jıi bola bermeıdi. Sebebi "The World’s Best" eń úzdik shoý jáne qatysýshylary da "sen tur men ataıyn", degen talanttylar. 

—Dımashtyń sońǵy saıystaǵy ónerinen keıin sahna syrtynda qandaı jaıt oryn aldy?

Meniń sheteldik áriptesterim meni qushaqtap, betimnen súıip, quttyqtap jatty. Dımashtyń adam sengisiz talantyn aıtyp, tańdanystaryn jasyra almady. Onyń basqalardan daralanyp turatyn ónerin sóz etti. Dımashtyń ánin tań-tamasha bolyp tyńdaǵan kórermenderdiń rızashylyǵyn, emosıasyn aıtyp jetkizý múmkin emes. 

— Uıymdastyrýshylar qatysýshylardy qaıda ornalastyrdy?

Kelisimshart boıynsha atalmysh saıysqa qatysýshylarmen biz sóılesip, jaqyn aralasa almaımyz. Árıne men qatysýshylarmen aralasyp, sóıleskim keldi. Ókinishke qaraı buǵan qatań túrde tyıym salyndy. Bul da durys shyǵar. Sebebi bizdiń pikirimizdiń obektıvti bolýy kerek. Ádil baǵa berý bul saıysta óte qıyn.  Sebebi árbir sarapshynyń óz jerlesterine búıregi buryp turatyny belgili. Men de óz jerlesterime barynsha qoldaý bildirip, kómekteskim keldi. Biraq kelisimsharttyń aty kelisimshart.

— Atalmysh saıysqa qatysýshylarǵa qandaı talap qoıyldy?

Biregeılik. Erekshelik. Álemdegi birneshe mıllıard adamnyń arasyndaǵy úzdigi bolý. Bul saıysqa qatysý úshin siz basqalar isteı almaıtyn ónerińizdi kórsetýińiz kerek. Eger sizdiń ónerińizdi álemdegi birde-bir adam qaıtalaı almaıtyn bolsa, qatysýǵa ótinish bildirińiz. Qazir uıymdastyrýshylar kelesi maýsymǵa qatysýshylardy iriktep jatyr. 

— Dımash pen Danelıanyń jeńý múmkindigi qandaı?

— Óte joǵary dep esepteımin. Men jerlesterimmen maqtanamyn. Taqymymyzdy qysyp, qoldaý bildiremiz. Nátıjesin aldaǵy ýaqytta kóresizder

Aýdarǵan: Ásel Bolatqyzy