Almatyda batpaqqa batqan turǵyndar qala ákimi Baýyrjan Baıbekten kómek surap otyr. Óıtkeni, Alataý aýdanynyń ákimdigi 13 jyldan beri qur ýádemen toıdyryp keledi eken. Alǵashynda jurt óz qarjylaryna jol tósepti. Biraq shendiler qubyr júrgizemiz dep jap-jaqsy tastyń kúl-talqanyn shyǵardy, deıdi. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.

Aıaǵyn bassa, batpaqtan áreń shyǵaratyn Áıgerim yqshamaýdanynyń turǵyndary 13 jyldan beri jol azabyn tartyp keledi. Bıyl, tipti úılerinen shyǵýdan qalǵan. Aıaqtaryna rezeńke etiktiń de, qonyshy uzynyn da satyp alatyn bolypty. Balalardy qaıdam, munda eresekterdiń ózi áreń júredi. Kóshedegi mı batpaqty keshken turǵyndardyń aıaǵynan táýir báteńke kórmeısiń. Rezeńke etik kıip, ekinshi aıaq kıim qoldarynan túspeıdi. Bir mezgilde birnesheýi jyrtylyp, "bazardaǵy saýdagerdiń saýdasyn júrgizip jatqan bizbiz" dep ashýly. Jol jóndelmese, eń qurmasa, shendiler tegin selofan paket taratsyn, deıdi kópshilik.

 «Bir aıaq kıimniń ózi 2000-3000 turady. Kishkentaı balaniki. Bar tapqanymyz aıaq kıimine ketedi. Bala-shaǵamyz batpaqqa batatyn boldy. Tórt balam mektepke barady. Balalardy úlkender kúzetip mektepke jetkizedi, jastary baǵanany ustap aıaldamaǵa áreń barady. Qarttar taıaqqa súıenbese júre almaıtyn kúıde. Traktordyń ǵana kúshi jetetin laı balshyqqa basqa temirdiń shamasy joq. Úıińde ólip ketseń de, jedel-járdem bylǵamaıdy kóligin bul mańǵa kep»,- deıdi turǵyn Bekbolat Sádýbaev.

Talaı shendige aıtqanymen, eshqaısy qulaq túrmegen. Sondyqtan, Baýyrjan Baıbekke sálem aıtty jurt.

 «Men qartaıǵanda osy ma edi kóretinim? Myna 21 ǵasyrda. Mynaý Baıbekke sálem aıt. Mynaý durys emes. Bul ne degen sumdyq?» - dep nalydy turǵyndardyń biri Aıymhan Muqaeva.

«Baǵdat Manzýrov sol kisi 2018 jyly bitiremiz degen. Aýmın joq. Ol kisiniń ornyna basqa keldi. Batpaq keshkenimiz keshken. Aqjaǵalylardan aqjol kútip sharshaǵan soń jurt óz qarjyldaryna kezinde tas tósegen. Salyq tólesek te, úkimetke salmaq salmaýdy oıladyq deıdi. Alaıda, "ortalyqtandyrylǵan qubyr ornatamyz" degen mamandar eki jyldan beri eki shaqyrym jerdiń jumysyn bitire almaı kúıdirdi», - deıdi turǵyn Jeńis Izzatbekov.

 «Bul eki jyl boldy, jasap jatqandaryna. Jasalyp bitpeıdi. Neshe podrádchık aýysty, jasaǵandary osy. Keshe tósep... Ezilgen laıdy alyp basqa topyraq ákeldi. Ózgergen eshteńe joq», - dep aıtty turǵyndardyń biri Qaırat Rasýlbekov.

Mı batpaqty kórýge Alataý ákimdiginiń shendileri de keldi. "Aıaǵyna laı juqtyryp alamyn" dedi me, áıteýir týra murnymyzdyń tusyna deıin kólikpen jetti. Jyltyraǵan qara túflıin kórip turǵyndar da qyzǵana qaraýda. Biraq, sheneýnik "bárine  káriz ben sý qubyryn ornatqan merdigerler kináli" deıdi. Oǵan tapsyrysty energetıka basqarmasy beripti. Ózderi sottasyp júrgenge uqsaıdy. Eger qalalyq áriptesteri jumysyn aıaqtasa, qalǵanyn pysyqtaýǵa ázirmiz dep sendirdi.

«Sý men káriz júıesiniń jumysy aıaqtalǵannan keıin avtomobıldi bólimge usynys berilgen. qazirgi tańda jobalyq smetasy daıyn. Maslıhattan aqsha bólingen jaǵdaıda 2019 jyly josparlanyp otyr», deıdi Alataý aýdany ákimdiginiń komýnaldyq-sharýashylyq bóliminiń basshysy Ádilet Toqtasynov.

Áıgerim yqshamaýdany qalanyń tómengi bóliginde ornalasqanymen, halqy kóp. 24 myń turǵyn bar. Aýdannyń qurylǵanyna on jyl bolǵandyqtan jol tóseýge bárine kúshi de, ýaqyttary da bolmaı jatyr eken. Megapolıste turyp jatqanyna uıalǵan jurtqa olar "Almatynyń joǵarǵy bóligi bir kúnde qurylmady" dep, qysqa qaıyrdy.

Usynǵan: Nazerke Labıhan