Qazaqstan úkimeti shekaradaǵy ótkizý pýnkterin jańǵyrtýǵa Qytaıdan 2 mıllıard ıýán (100 mıllıard teńge) qaryz alýdy josparlap otyr, dep habarlaıdy Qamshy.kz aqparat agenttigi Sputnik Qazaqstanǵa silteme jasap.  

Búgin májilistiń jalpy otyrysynda Qytaıdyń Eksımbankinen qaryz alý boıynsha kelisimdi ratıfıkasıalaý zań jobasy qaraldy. Premer-mınıstrdiń birinshi orynbasary – qarjy mınıstri Álıhan Smaıylovtyń aıtýynsha, qaryzdyń jalpy somasy 2 mıllıard 65 mıllıon ıýán, ıaǵnı teńgege shaqqanda 100 mıllıard teńgege jýyq.

Kelisimge sáıkes, Qytaı banki jeńildikti kredıtti jyldyq stavkasy 2 prosentpen 20 jylǵa beredi. Bul aqshaǵa Qytaı, Ózbekstan jáne Túrikmenstanmen aradaǵy shekarada ornalasqan 10 ótkizý beketin, onyń ishinde 9 avtokólik jáne 1 temirjol pýnktin jańǵyrtý kózdelip otyr.

"Ótkizý pýnkteri qulaǵaly turǵan joq. Qazir bizdiń kedendik ótkizý pýnktteri táýligine 450 kólik qana ótkizýge qabiletti. Biz osy qabilettilikti 5400  avtokólikke deıin jetkizýdi josparlap otyrmyz. Bul degenimiz búdjetke qosymsha salyq, ekinshiden, Qazaqstannyń tranzıttik hab retinde áleýetin ulǵaıtady", - dedi Smaıylov májilis kýlýarynda.

Mınıstr Qytaı aldynda budan bólek memlekettik qaryz joq ekenin atap ótti. Tek qarjy mınıstrliginiń berilgen kepildikteri bar.

"Memleket tarapynan Qytaıdan kredıt alynǵan joq. Biraq qarjy mınıstrligi bergen kepildikter bar, ıaǵnı mıllıard 200 mıllıon dollar shamasynda. Bul Qytaıdyń Eksımbankinen jáne Qytaıdyń memlekettik damý bankinen avtojol jobalaryn iske asyrýǵa tartylǵan kredıttermen baılanysty", - dedi ol.

Májilis depýtattary Qazaqstan úkimeti men Qytaı úkimeti arasyndaǵy QHR  jeńildikti kredıt berý týraly negizdemelik kelisimdi ratıfıkasıalaý týraly zań jobasyn maquldady.

Usynǵan: Nazerke Labıhan