Avdarmada ata-ana men bala ózara gagaýz tilinde sóılesýi úshin jańa eksperıment oılap tapty. Mektep tabaldyryǵyn attaǵan bala óziniń ana tilin erkin meńgergen bolsa, onyń ata-anasyna qosymsha 10 000 leı (600 AQSH dollary) qarjy tólenetin bolady. Bul jaıynda Qamshy.kz aqparat agenttigi Avdarma.md saıtynyń deregine súıenip habarlaıdy.

Elena Karamıt esimdi depýtattyń bul bastamasyna aýyl mesenattary da  qoldaý bildiripti. Jańa eksperıment 2019 jyldyń sońyna deıin jalǵasatyn bolady.

Mektep tabaldyryǵyn áli attamaǵan balalar jáne basqa da jasóspirimderdiń gagaýz tilin bilmeýi – bul elde kún tártibinde turǵan másele retinde qarastyrylýda.

Mektepke alǵash barǵan balanyń gagaýz tilin bilmeýiniń sebebin jergilikti muǵalimder otbasynda ana tilinde qarym-qatynastyń azdyǵynan ekendigin aıtady. Búginde osy problemany sheshýge kóp kóńil bólinip, balabaqshalar men avtonomıaly mektepterde gagaýz tilinde balalarmen qarym-qatynas jasaýdy damytyp, sol úshin jaǵdaı jasaý kózdelýde.

Búginde til máselesi gagaýz qoǵamynda qyzý talqylana bastaǵan. Gagaýz halyqtyń keńesiniń depýtattary biraýyzdan «Gagaýz tilin qoldaný aıasyn keńeıtý týraly» sheshim qabyldap, 2019 jyldyń basynan bul zań óz kúshine endi.

«2017 jyly bizdiń lıseıge  35 bala birinshi synypqa kelgen bolatyn, olardyń ishinde tek 3-i ǵana gagaýz tilin erkin meńgergen. Biz depýtattarmen birlese otyryp bir jarym jyl boıy bul máseleniń sheshimin qarastyrdyq, keıinnen gagaýz tiline baılanysty jańa zań qabyldaý qajet dep sheshtik. Adamdarmen sóılesý barysynda olar óz otbasylarynda gagaýz tilinde bir-birimen qarym-qatynas jasamaıtyndyǵy belgili boldy. Sondyqtan, keleshek urpaq ana tilin erkin meńgerýi úshin oǵan qolaıly jaǵdaı týyndaý qajettigin túsindik», - dep aıtyp ótti depýtat Elena Karmıt.

Onyń aıtýynsha, depýtattyń bastamasyna Avdarma aýyldarynyń mesenattary qoldaý bildirip, óz otbasynda balalaryna gagaýz tilin úıretken ata-anaǵa qosymsha járdemaqy berý qarastyrylypty.

«Balalar mektep tabaldyryǵyn attaǵannan keıin olarmen gagaýz tilinde aýyzsha suhbat quramyz. Balany jasyn esepke ala otyryp, onyń gagaýz tilin qanshalyqty meńgergenin qarap, onyń ata-anasyna 10 000 leı kóleminde syıaqy tóleıtin bolamyz. Bizdiń bul tájirıbemiz óz nátıjesin berip, gagaýz tiliniń qoldanylý aıasyn keńeıtedi dep senemiz. Bul – bizdiń keleshek urpaǵymyzdyń aldyndaǵy basty mindetimiz», - dep aıtyp ótti Elena Karamıt.

Usynǵan: Nazerke Labıhan