Elbasy Nursultan Nazarbaev Premer-Mınıstr A.Mamın, Prezıdent Ákimshiliginiń basshysy Á.Isekeshev jáne Premer-Mınıstrdiń orynbasary G.Ábdiqalyqova qatysýymen jıyn ótkizdi dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Keńesti ashqan Nursultan Nazarbaev qazaqstandyqtardyń ál-aýqatyn arttyrýǵa jáne turmys sapasyn jaqsartýǵa baǵyttalǵan sharalardy sapaly júzege asyrýdyń mańyzdylyǵyn atap ótti.

– Jaqynda ótken «Nur Otan» partıasynyń sezinde áleýmettik saıasat salasyndaǵy sharalardyń iske asyrylýyn egjeı-tegjeıli qarastyrdyq. Men turmysy nashar jáne áleýmettik turǵydan az qamtylǵan turǵyndarǵa qoldaý kórsetý jóninde jańa aýqymdy sharalar usynǵan bolatynmyn. Biz búgin olardy iske asyrý jónindegi is-qımyl josparyn jan-jaqty talqylaımyz, – dedi Qazaqstan Prezıdenti.

Basqosýda Memleket basshysyna júktelgen mindetterdiń oryndalýy, sonyń ishinde áleýmettik saıasattyń júzege asyrylýyn zańnamalyq turǵydan qamtamasyz etilýi jóninde Úkimettiń jumys jospary tanystyryldy.

Jıynǵa qatysýshylardyń baıandamasyn tyńdaǵan soń, Elbasy halyqtyń kómekke muqtaj sanatyna jatatyndardyń bárine áleýmettik járdem berý qajet ekenin aıtty.

– Áleýmettik turǵydan turmysy tómen otbasylardy qoldaýǵa bólinetin qarajat salyq túsimi esebinen quralatynyn túsingen jón. Sondyqtan, memlekettiń tıisti tepe-teńdikti saqtaı otyryp, kómekke asa muqtaj jandarǵa árdaıym qoldaý kórsetetinin barshaǵa túsindirý kerek, – dedi Nursultan Nazarbaev.

Qazaqstan Prezıdenti áleýmettik jaǵynan az qamtylǵan jáne kóp balaly otbasylar memlekettiń qamqorlyǵyn jaqyn arada sezinýge tıis ekenin atap ótti.

– Kómekke asa muqtaj jáne kóp balaly otbasylar bıylǵy 1 sáýirden qalmaı áleýmettik kómek alýy qajet, – dedi Qazaqstan Prezıdenti.

Elbasy memlekettik organdardyń basshylary men oblys ákimderiniń jumystaryn baǵalaý azamattardyń ál-aýqatynyń deńgeıine jáne turmys sapasyna tikeleı baılanysty bolatynyn atap ótti.

Memleket basshysy óńirlerde jalaqyny ósirý jónindegi sharalardyń  ýaqtyly qabyldanýynyń, bilim berý jáne densaýlyq saqtaý salalarynda júıeli reformalar júrgizýdiń, turǵyn úıler men ishki aýdandyq joldardy salý qarqynyn kúsheıtýdiń, sondaı-aq turǵyn úı-kommýnaldyq sharýashylyǵy men ekologıa problemalaryn sheshýdiń mańyzdy ekenin atap ótti. Sonymen qatar, «Qutty meken» ı «Aýyl – El besigi» jobalaryn ázirlep, júzege asyrýǵa erekshe nazar aýdaryldy.

– Oblystardyń, Astana, Almaty jáne Shymkent qalalarynyń ákimderi óńirdegi turǵyndardyń ózekti máselelerin jeke baqylaýǵa alyp, júktelgen mindetterdi iske asyrý úshin naqty sharalar qabyldaýy kerek. Sonymen qatar, áleýmettik saıasatty júzege asyrý úshin bólinetin qarajattyń tıimdi jumsalýyna baqylaý jasaý negizgi baǵyttyń biri sanalady, – dedi Nursultan Nazarbaev.

Memleket basshysy ekonomıkalyq saıasattyń tıimdiligin arttyryp, bul úderiske turǵyndardyń belsendi atsalysýy qajettigin atap ótti.

– Eń aldymen, halyqty jumyspen qamtý kerek. Memlekettik apparattyń mindeti – shaǵyn jáne orta bıznesti damytýǵa, jumys oryndaryn ashýǵa kúsh jumyldyrý. Bul jumysty barlyq qalalarda, aýdandar men aýyldarda jappaı júrgizý qajet, – dedi Qazaqstan Prezıdenti.

Sońynda Memleket basshysy Prezıdent Ákimshiligine «Nur Otan» partıasymen birlesip, júktelgen mindetterdiń oryndalý barysyn únemi baqylap otyrýdy tapsyrdy.

– Úkimet, ákimder, jurtshylyq jáne Nur Otan» partıasy naqty nátıjelerge qol jetkizý úshin osy jumysqa atsalysýy tıis. Men bul úderisti ózim  baqylaýǵa alamyn, – dedi Nursultan Nazarbaev.

Usynǵan: Nazerke Labıhan