Almaty ákimi Baýyrjan Baıbek «Nur Otan» partıasy qalalyq búrosynyń jıynynda qalada, sonymen qatar megapolıstiń shet aımaqtarynda abattandyrý, joldardy salý men jóndeý jumystaryn barynsha qarqyndy júrgizýdi tapsyrdy.
Sońǵy 10 jyl ishinde qalaǵa qosylǵan Alataý aýdanyn damytýǵa bılik 434 mlrd. teńge bóldi. Sonyń arqasynda munda 12 mektep, 5 emhana, 16 memlekettik jáne 151 jeke bala baqshalar, «Aqbulaq», «Alǵabas-6», «Saıaly» yqsham aýdandary, birqatar sport jáne mádenı keshender, onyń ishinde «Almaty Arena», «Alataý» dástúrli óner teatry boı kóterdi. Infraqurylymdy damytý úshin 223 km elektr, 276 km gaz jelileri, 688 km sý, 453 km káriz trýbalary tartyldy. 93 km jol jáne úsh jolaıryqtary salyndy.
Baýyrjan Baıbek munda asfálttalǵan joldyń tolyq salynbaǵanyna nazar aýdardy. Sonyń saldarynan sońǵy aıda 110 shaǵym túsken. Keıbir yqsham aýdandarda ınjenerlik jelilerdi júrgizgen merdigerlerdiń jaýapsyzdyǵynan tózgisiz jaǵdaılar qalyptasqan.
«Maǵan Alataý aýdanynyń turǵyndarynan shaǵym jıi túsedi. Adamdardy qınamaı, jaǵdaıdy túzetý qajet. Osyǵan oraı, 12 yqsham aýdanda jol salý úshin respýblıkalyq búdjetten josparlanǵan 3 mlrd. teńgege qosa Strategıa jáne búdjettik josparlaý basqarmasyna birqatar jobalardy ońtaılandyryp, jergilikti búdjetten taǵy 4 mlrd. teńge bólýdi tapsyramyn. Aýdan ákimi tıisti basqarmalarmen birge jumystyń sapasy úshin jeke jaýap beresiz. Men jıi baryp, atqarǵan jumystaryńdy tekserip turamyn», - dedi Baýyrjan Baıbek.
Osylaısha, Alataý aýdanyndaǵy «Aqbulaq», «Qarasý», «Uljan-2», «Alǵabas-AZTM», «Áıgerim-1», «Áıgerim-2», «Uljan-1», «Shańyraq-1», «Shańyraq-2», «Tomırıs», «Darhan-Baıbesik», «Kók Qaınar» yqsham aýdandaryndaǵy 440-tan astam kóshege uzyndyǵy 120 km bolatyn joldar salynady jáne jóndeledi.
Aıta keterligi, jaqynda Baýyrjan Baıbek aldaǵy kezde jóndeletin joldar men trotýarlarǵa qatysty jumys keńesin ótkizgen edi. Bıylǵy jyly uzyndyǵy 111 km bolatyn 120-dan astam kóshege aǵymdaǵy ortasha jóndeý jumystary júrgiziledi.
Bulardan ózge, megapolıs basshysy ashyq qalǵan lúktar men beti jabylmaǵan orlarǵa qatysty shaǵymdardyń jıi túsetinin, mundaı keleńsizdikterdiń ortalyq dańǵyldar men aýdandyq máni bar kóshelerinde oryn alǵanyn atap ótti.
Qalalyq mobıldilik basqarmasynyń basshysy Saǵyndyq Telibaev aýa raıy qolaıly bolsa barlyq magıstraldi kóshelerde aǵymdaǵy jóndeý jumystarynyń 10 kún ishinde júrgiziletinin habarlady.