Amerıkalyq Netflix servısi jazýshy Gabrıel Garsıa Markestiń «Júz jylǵy jalǵyzdyq» romany jelisimen serıal túsiredi. Bul týraly Netflix-tiń Twitter-degi paraqshasynda habarlandy.1967 jyly jazylǵan roman alǵash ret ekranǵa shyqpaqshy. 2014 jyly qaıtys bolǵan Markestiń otbasy buǵan deıin «Júz jyldyq jalǵyzdyq» shyǵarmasy boıynsha kıno túsirý quqyǵyn satýdan bas tartyp kelgen dep jazady Qamshy.kz aqparat agenttigi Azattyqtyń deregine súıene otyryp.
Kolýmbıada ıspan tilinde túsiriletin serıaldyń prodúserleri - Markestiń Rodrıgo jáne Gonsalo esimdi uldary.
«Ákemiz fılm janry shyǵarmany baıandaýǵa tym qysqa bolady dep, «Júz jyldyq jalǵyzdyqty» ekranǵa shyǵarýǵa kelispedi. Ol fılmdi tek ıspan tilinde túsirgen jón dep sanady», - deıdi jazýshynyń uly Rodrıgo Variety saıtyna bergen suhbatynda.
«Qazir serıaldardyń «altyn dáýiri» týdy. Sondyqtan, romandy túsirýge budan qolaıly ýaqyt bolmaıdy», - deıdi prodúser.
1967 jyly shyqqan «Júz jyldyq jalǵyzdyq» romany úshin Gabrıel Garsıa Markes Nobel syılyǵyn ıelengen. Álemdik eń tanymal ádebı shyǵarmalardyń birine aınalǵan roman qazirge deıin 50 mıllıonnan artyq tırajben tarap, 46 tilge aýdarylǵan dep jazady New York Times basylymy.
Usynǵan: Ásel Bolatqyzy
