Kolın Djons pen Polına Iang 1976 jyly tanysqan. Al bir jyl boıǵy kezdesýden keıin er adam izdegen adamy Polına ekenin túsindi. Biraq, áıel Kolınniń turmysqa shyǵý týraly usynysyn qabyldamady. Osylaı, ol jyl saıyn Kolınniń otbasyn qurý týraly usynystarynan bas tarta bergen. Al endi, 42 jyldan jáne 42 sátsizdikten keıin, olar ózderiniń qarym-qatynasyn zańdastyryp, nekege otyrdy, dep jazady Qamshy.kz aqparat agenttigi Stan.kz saıtynyń deregine súıenip.
Kolın men Polına alǵash ret balalary oınaıtyn oıyn alańynda kezdesken. Kolın Polınaǵa bir kórgennen ǵashyq bolǵanyn aıtty. Alǵashynda olar Anglıanyń Ýels qalasynda turǵan, biraq 14 jyl buryn Polına Maltaǵa kóship ketýge sheshim qabyldaıdy. Onda ǵashyqtar kishigirim qonaq úı ashyp, birge jumys istedi.
«Biz 43 jyl boıy birge boldyq. Kóptegen juptar osylaı deıdi, biraq olar bir-birin qansha ýaqyt kóredi? Jumysqa barar aldynda bir saǵat jáne jumystan kelgennen keıin bir saǵat. Al biz birge ómir súrip jáne birge jumys istedik»,- deıdi Kolın.
Adamdar barlyq ýaqytty birge ótkizgen kezde bir-biriniń minez-qulqyndaǵy kemshilikterdi baıqamaýy múmkin emes. Biraq, Kolın men Polına zańdy túrde nekege turmasa da, ómir boıy birge turyp, bir-birin jaqsy túsinip keldi.
Biraq, ýaqyt óz degenin alady demekshi, sońǵy kezde Polınanyń densaýlyǵy syr bere bastady. Sodan ǵashyq jup dárigermen keńesýdi sheshedi. Ókinishke oraı, dárigerler áıeldiń kortıkobazaldy degenerasıaǵa shaldyqqanyn aıtady, jáne bul dıagnozdy estigennen keıin Kolın men Polına óz otandaryna oralýǵa sheshim qabyldaıdy.
Polınamen birge turǵan ýaqytynda Kolın oǵan 42 ret turmysqa shyǵý týraly usynys jasap, 42 jyl áıeli bolýyn suraǵan. Al ol úmitin úzgende, 43-shi usynysty Polınanyń ózi jasady. 42 jyl boıy «ıá» degen jaýapty kútken Kolın bul usynysty estigende tańǵalǵannan tósekten qulap kete jazdapty.
Sodan olar úılený toılaryn áýlıe Valentın kúninde qarttar úıinde jasaýǵa sheshim qabyldady. Osylaısha, 42 jyl boıy bir-birinen aıyrylmaǵan qarttar aqyry nekelerin zańdastyrdy. Al, qarttar úıiniń ákimshiligi kúıeý jigit pen qalyńdyqqa syılyq jasap, olardyń qurmetine qabyldaý uıymdastyrdy.
Usynǵan: Nazerke Labıhan
