Almatylyq kelinshek basynan ótken adam sengisiz oqıǵany aıtyp berdi, dep jazady Qamshy.kz aqparat agenttigi 

Ómir men ólimniń arasynda, dárigerlerdiń tilimen aıtqanda, klınıkalyq ólim degen kezeń bolady. Ol kezde adamnyń bir sátke tynysy toqtap, júregi tynshıdy.

Allanyń qudiretimen osyndaı kezde keıbir adamdardyń júregi qaıtadan soǵyp, boıyna jan bitedi. Qazaqtar ondaıda "arǵy jaqqa baryp keldi, arýaǵy myqty eken, qaıtaryp aldy" dep kúbirlesip jatady. Bul ózi ómirde ilýde bir ret kezdesetin sırek qubylys.

Sondaı sırek qubylysty basyn ótkergen almatylyq – Gúlim Aqsary (aty-jóni ózgertilip alyndy).

Gúlimniń aıtýynsha, 2005 jyly Almaty qalalyq №12 aýrýhanada ota jasaǵan dárigerler ony "óldi" dep jalańash kúıi súıremeli tósegimen dálizge shyǵaryp tastaǵan eken.

"Ornymnan tursam dálizde jatyrmyn. Anandaıda júrgen meıirbıkelerdiń biri meniń turǵanymdy kórip, tura júgirdi. Ekinshisi qasym kep, qolymnan ustady. "Seni óldi degen" dedi sosyn. Bir ýaqytta botadaı bozdap ápkem keldi. Aıǵaı-shý shyǵardy. Sóıtip meni aqyly bólimge aýystyrtqyzdy", - deıdi almatalyq kelinshek qyz kúninde basynan ótken oqıǵany eske alyp.

Gúlimniń aıtýynsha, onyń aıaq-astynan tirilip ketkenine, ásirese dárigerler qatty ashýlanypty.

"Soqyrishegim jarylǵan ǵoı. Sonyń soqyrishek ekenin bilmeı, ishimdi ary-beri qoparyp, aqyry ol jarylypty. Odan soń "bul báribir adam bolmaıdy" dep, ota kezinde ishekti de aıamaı kesip, ishimdi búrip qalaı bolsa solaı tige salǵan.

Bir sózben aıtqanda, basynan bastap aıaǵyna deıin dárigerlik qate tunyp tur. Tirilgen soń olar, árıne qatty shoshydy. Aqyly bólimge aýystyryp, durystap qaraǵandaı boldy", - deıdi ol.

Sol kezde durys jasalmaǵan otanyń zardabyn áli tartyp júrgenin aıtqan Gúlim ekinshi ret qalaı ólip-tirilgenin de baıandap berdi.

"Atylǵan oq qusap zýlap keledi ekem. Qalaı tez júgiretin bop ketkenmin dep tańǵalyp qoıamyn. Bir ýaqytta tómenge qarasam astymda adamdar júr. Sóıtsem men aýrýhananyń tóbesinde ushyp júr ekem. Shoshyp kettim.

Jan ushady degen osy eken ǵoı dep oılap qoıamyn. Ne kerek zyryldap palatalarǵa birinen soń birine kire bastadym. Aqyry birinen ózimdi taýyp aldym. Naqtyraq aıtqanda, denemdi taptym", - deıdi ol Almatydaǵy №3 perzenthanada 2011 jyly tuńǵyshyn bosanǵan kezdi eske alyp.

Kelinshektiń ushyp júrgen jany qansha talpynsa da, denesine qona almapty.

"Dárigerler qaýmalap tur. Bas dáriger bolýy kerek: "Alma, tursyn" dep jatyr. Soǵan qaraǵanda apparatqa qosqan sekildi. Endi ne isteýim kerek dep shyr-pyrmyn. Denemniń qasyna baryp jatamyn. Aınalsoqtap ary-beri júremin. Biraq onymnan túk shyqpady.

Bir ýaqytta tóbege qarasam bir bópeniń saýsaqtary kórinip tur eken. Jalma-jan ushyp baryp sol sábıdiń saýsaqtarynan ustadym. Osy kezde denemmen selk etip oıandym. Qolymda jańa týǵan qyzym jatyr eken. Qýanǵanymnan tunshyǵyp jylap jiberdim", - degen kelinshek sodan bastap namazǵa jyǵylǵanyn aıtady.

Sóıtse, dárigerler narkozdan soń ony oıata almaǵan. Bir táýlik boıyna oıanbaǵan kelinshektiń kúıeýine bir medbıke tipti: "Daıyndala berińiz" dep estirtip úlgeripti.

"Turǵan soń birden kúıeýime telefon soqtym. Qaıda júrsiń desem, "Sen shynymen Gúlimsiń be" deıdi. Qatty ashýym keldi. Sóıtsem ol iship alypty kúıikten. Kúıeýim meni óldi dep oılapty" , - deıdi ol.

Osy jaıttardan soń Gúlim tús arqyly ómirde bolatyn keıbir jaıtty aldyn ala bilip otyratyn qasıetke ıe bolǵanyn aıtady.

"Tús kóremin. Jorımyn. Sol týra keledi. Biraq munymdy eshkimge aıtqan emespin. Óıtkeni oǵan ózge túgili ózim de senbeımin, onsha mán bermeımin", - deıdi ol.

Usynǵan: Nazerke Labıhan