9 naýryz Atyraý oblystyq ákimdikte oblys ákiminiń birinshi orynbasary Serik Shapkenovtyń qatysýymen balyqtyń jappaı qyrylýyn tekserýge arnalǵan vedomstvoaralyq komısıanyń májilisi ótti, dep habarlaıdy Qamshy.kz aqparat agenttigi.
Májilis barysynda málim bolǵanyndaı, eki kún ishinde arnaýly avtobaza, oblystyq orman sharýashylyǵy jáne janýarlar álemi, balyq sharýashylyǵy basqarmalarynyń qyzmetkerlerimen jarty tonnaǵa jýyq (493 kg.) óli balyq jınalyp, aktilengen soń, joıyldy. Mamandardyń aıtýynsha, shara kezinde alynǵan barlyq málimetter quqyqqorǵaý organdaryna tapsyrylyp, atalmysh fakti boıynsha budan buryn kóterilgen qylmystyq iske qosylady eken.
Atyraý oblystyq balyq sharýashylyǵy basqarmasynyń basshysy Artýr Sádibekuly habarlaǵanyndaı, «Amangeldi» balyq kooperatıviniń kemesi Damby men Temir jol kópiri aralyǵyndaǵy ózen betindegi muzdy jaryp shyqqan eken. «Budan ári tabıǵat paıdalanýshy kásiporyndardyń ózende paıdalanatyn tehnıkasymen búkil ózenniń boıyndaǵy óli balyq jınalady»,- dedi ol.
Atyraý oblysynyń birinshi orynbasary Serik Shapkenov jınalǵandarǵa atap ótkenindeı, vedomstvoaralyq komısıa birqatar jumysty atqaryp, bolǵan oqıǵanyń sebep-saldaryn jiti qadaǵalap, jaǵdaıǵa naqtyly qadaǵalaý ornatqan eken. – Ártúrli arandatýshylyqqa jáne astyrtyn túrde kedergi keltirýshilerge jol bermeýimiz kerek. Qazirgi ýaqytta tergeý qupıalylyǵyn saqtaý maqsatynda keıbir jáıttardy jarıa ete almaımyz. Eń bastysy, ne bolǵanyn habarlaý emes, Jaıyqty qutqarý. Osyny esten shyǵarmaıyq. Jaǵdaı oblystaǵy barlyq quzyrly organdardyń jáne aımaq basshylyǵynyń nazarynda, - dedi Shapkenov myrza.
Balyq sharýashylyǵy basqarmasynyń basshysy Artýr Sádibekuly habarlaǵanyndaı, ózen jaǵalaýyn óli balyqtan tazartý úshin mamandarǵa kómektesýge qoǵamdaǵy belsendi azamattardan bastamashyl top qurylypty.
Bul óte oryndy jáne ýaqytyly bastama eken, olarǵa qoldaý kórsetýimiz kerek. Biraq, eń aldymenen, qaýipsizdik jaǵdaıyn da esten shyǵarmaǵan abzal. Jaǵalaýda Tótenshe jaǵdaıldar departamenti, mamandar balyqty ózennen jınaýy kerek, al eriktiler jaǵalaýda, qaýipsiz aımaqta tazartqany durys,- dedi Serik Shapkenov.
Májilis qorytyndysymen 10 naýryzda ózendi óli balyqtan tazartýǵa shyqqan adamdardyń saǵat 10. 00-de jınalý úshin 4 oryn belgilendi.
1-inshi oryn: aınalma kópirden buryńǵy AHAJ (ZAGS) kópirine deıingi aralyq (koordınatory Áıgerim Dosqalıeva, tel. nómiri: 8775 454 0490);
2-inshi oryn: AHAJ kópirinen Álıev kópirine deıingi aralyq (koordınatory Shynar İzteleýova, tel. nómiri: 87017812968) ;
3-inshi oryn: H. Dosmuhamedov atyndaǵy ýnıversıtetten Jılgorodok yqshamaýdany mańyndaǵy kópir aralyǵy (koordınatory Sara Jumaqulova, tel. nómiri: 8701 4343998);
4-inshi oryn: Jılgorodok yqshamaýdany kópiri mańynan Balyqshy yqshamaýdanyna deıingi aralyq (koordınatory Meıramgúl Esnıazova, tel. nómiri: 8775 0288336).
Uıymdastyrýshylardyń habarlaýynsha, barlyq jerlerde de Tótenshe jaǵdaılar jónindegi departamenttiń, «Arnaıy avtobaza» JSHS mamandarynyń kezekshi qosyndary qyzmet kórsetip, ózendi tazalaý úshin tehnıkamen, qural- jabdyqtarmen qamtamasyz etiledi.
(fotonyń Jaıyq ózenine qatysy joq)
Janat Azatova
Usynǵan: Gúlim Jaqan
