Elordada «Nur Otan» partıasynyń qoldaýymen Qazaqstan múgedekter konfederasıasy uıymdastyrǵan dástúrli «Jan Shýaq» qoǵamdyq syılyǵynyń jeńimpazdary marapattaldy. Atalǵan syılyq eldiń mádenı, sport jáne qoǵamdyq ómirine belsene aralasqan múmkindigi shekteýli jandarǵa, sondaı-aq, erekshe qajettiligi bar azamattardyń turmysyn jaqsartýǵa úles qosqandarǵa beriledi.

Jeńimpazdardyń birin marapattaǵan «Nur Otan» partıasy Tóraǵasynyń birinshi orynbasary Baýyrjan Baıbek Elbasy tapsyrmasyna sáıkes qolǵa alynǵan «Kedergisiz keleshek» jobasy aıasynda sońǵy úsh jylda 20 myńnan astam áleýmettik mańyzy bar nysannyń múmkindigi shekteýli jandardyń qajettilikterine qaraı jabdyqtalǵany, zańdarǵa 78 túzetý engizilip, qurylys talaptary men erejeleri qaıta qaralǵany týraly aıtty.

«Búgin osy zalǵa kúsh-jigeri muqalmaǵan, ómirge qushtar jandar jınalyp otyr. «Nur Otan» bıleýshi partıa retinde erekshe qajettiligi bar azamattarǵa qashan da qoldaý bildirip keledi. Osy jyldyń ózinde partıamyzdyń qoǵamdyq qabyldaý bólmelerine 2 myńnan astam aıryqsha qajettiligi bar azamat ótinishpen keldi. Ár tórtinshi másele sol jerde birden sheshimin tapty. Qazaqstan múgedekter konfederasıasynyń prezıdenti Janat Omarbekova – bizdiń Májilistegi fraksıamyzdyń ókili. Búginde osyndaı adamdardyń depýtattyq qyzmet atqarýy, osy sanattaǵy azamattardyń quqyqtaryn qorǵaıtyn tıisti zańdardyń qabyldanatyndyǵyn jáne olardyń máseleleriniń sheshimin tabatynyn kórsetedi. «Nur Otan» partıasy muny jan-jaqty qoldaıdy. Onyń ústine, partıanyń 13 myń múshesi erekshe qajettiligi bar adamdar ekenin biz únemi qaperimizde ustaımyz» - dep atap ótti Baýyrjan Baıbek.

Qazaqstan múgedekter konfederasıasynyń prezıdenti Janat Omarbekovanyń aıtýynsha, «Jan Shýaq» syılyǵy taǵaıyndalǵannan beri, elimizdiń túkpir-túkpirinen kelgen 60-tan astam qazaqstandyq onyń jeńimpaz atandy.

«Tabysty adam – ol mol aqsha tapqan emes, kóp ıgi ister jasaǵan adam. Bul rásimdi Halyqaralyq múgedekter kúni men osy marapattyń bastamashysy - Iran Omarbekovtiń týǵan kúni qarsańynda ótkizý jaqsy dástúrge aınaldy. «Nur Otan» partıasynyń atynan saılanǵan depýtat retindegi zańshyǵarýshylyq qyzmetimizde elimizdiń múmkindigi shekteýli jandar úshin eshqandaı kedergileri joq, ınklúzıvti jáne damyǵan memleket bolýy jolynda jumys isteımiz. Osylaısha, qoǵam erekshe qajettiligi bar adamdardy teń dárejede qabyldaıtyn bolady» - dedi ol.

Saltanatty shara barysynda «Erekshe qajettiligi bar azamattarǵa degen qoǵamdyq sananyń oń ózgerisine qosqan úlesi úshin» júldesine Jadyrasyn Sadýaqasov ıe boldy.

«Eriktiler qozǵalysyn damytýdaǵy jetistikteri úshin» atalymy boıynsha syılyqqa Qostanaı qalasynan kelgen Iýlıa Zavodchıkova laıyq dep tanyldy. Onyń «28 ilmek» klýbynyń eriktileri shala týǵan nárestelerge arnap júnnen arnaıy kıim-keshekter toqıdy.

«Sport salasyndaǵy jetistigi úshin» atalymy boıynsha jasóspirimder arasynda Tokıoda ótken Azıa paralımpıada oıyndarynda 4 medal jeńip alǵan Nur-Sultan qalasynyń turǵyny Sıazbek Dalıev marapattaldy.

«Múmkindigi shekteýli jandardyń máseleleri men ómirin jarıalaýǵa qosqan úlesi úshin» syılyǵyna Shýchınsk qalasynan kelgen Qanat Baıburov laıyq dep tanyldy.

«Kásipkerlik qyzmetti damytýǵa qosqan úlesi úshin» Dına Erdildınova marapattaldy. Onyń múgedekter arbasyn jóndeıtin ortalyǵy medısınalyq jáne áleýmettik mekemelerde tehnıkalyq qyzmet kórsetedi.

«Múmkindigi shekteýli jandardy jumysqa ornalastyrý úshin jasalǵan úzdik jumys orny úshin» syılyǵyn Erbol Nurqatov jeńip aldy. Ol aqyl-esinde aýytqýshylyǵy bar adamdarǵa arnalǵan emdeý-óndiristik sheberhanalarda óndiristik jáne qalpyna keltirý jumystaryn ashyp, ony jolǵa qoıý jumystaryn atqarady.

«Óner jáne mádenıet salasyndaǵy jetistikteri úshin» óskemendik Ekaterına Fedorenko marapattaldy. Ol – arbamen bı bıleý boıynsha el birinshiliginiń jeńimpazy. Sondaı-aq, Ekaterına bı bıleýden bólek múgedekterge, jalǵyz basty zeınetkerlerge, UOS ardagerlerine, múgedek balalardy tárbıelep otyrǵan kóp balaly otbasylarǵa aqysyz kólik qyzmetin usynatyn «Avto-Eriktiler» jobasyna da belsendi túrde at salysyp keledi.